Pwovèb 30–31

Pwovèb 30

¹Men pawòl Agou, pitit Jake, moun peyi Masa. Men deklarasyon nonm lan te fè: Mwen bouke, Bondye! Mwen bouke, Bondye! Mwen pa kapab ankò! ²Mwen sòt pase panyen pèsi. Se pa moun mwen ye. Mwen pa gen lespri tankou tout moun. ³Mwen pa janm konnen sa ki rele konesans. Mwen pa konprann anyen nan bagay Bondye. ⁴Ki moun ki janm moute nan syèl, apre sa ki redesann sou latè? Ki moun ki janm ranmase van yo nan men l'? Ki moun ki janm mare dlo yo nan rad li? Ki moun ki fikse limit tè a? Ki jan li rele? Ki jan pitit li rele? Di m' non, si ou konnen? ⁵Bondye toujou kenbe pawòl li. Li pwoteje tout moun ki mete konfyans yo nan li. ⁶Pa fè l' di sa li pa di. Si ou fè sa, l'a fè ou repwòch, l'a fè tout moun wè se mantò ou ye. ⁷Bondye, se de bagay ase mwen mande ou: Tanpri, pa refize m' yo anvan mwen mouri. ⁸Men yo: Pa kite m' bay manti pou m' twonpe moun. Pa fè m' ni rich ni pòv. Ban m' kantite manje mwen bezwen pou m' viv la. ⁹Si mwen gen twòp, m'a vire do ba ou, m'a di mwen pa konnen ki moun ou ye. Si mwen pa gen ase, m'a vòlò, m'a fè yo pase ou nan betiz. ¹⁰Pa janm pale yon domestik mal devan mèt li. L'a madichonnen ou, l'a fè ou peye bouch ou. ¹¹Gen yon kalite moun k'ap bay papa yo madichon, ki pa gen konsiderasyon pou manman yo. ¹²Gen yon lòt kalite moun ki konprann yo nan kondisyon pou fè sèvis Bondye. Men, pi mal pase yo nanpwen. ¹³Gen yon lòt kalite moun ankò ki mete nan tèt yo yo pa kanmarad pesonn, wa pa kouzen yo. ¹⁴Gen yon lòt kalite moun, se bèt nan bwa yo ye. Pou yo viv, y'ap devore malere yo, y'ap pwofite sou pòv yo. ¹⁵Sansi gen de pitit fi: tou de gen menm non, yo rele: Ban mwen! Ban mwen! Gen twa bagay ki pa janm di ase. Sa m'ap di la a! Gen kat bagay ki pa janm di se kont. ¹⁶Men yo: Se peyi kote mò yo ye a, se fanm ki pa ka fè pitit, se tè a ki pa janm bwè kont dlo li, epi se dife. Bagay sa yo pa janm di ase. ¹⁷Yon pitit ki pase papa l' nan betiz, ki pa respekte lòd manman l', chen gen pou devore kadav li nan raje, zwezo nan bwa va manje grenn je li. ¹⁸Gen twa bagay mwen pa janm ka konprann. Sa m'ap di la a! Gen kat bagay konsa. ¹⁹Men yo: Se jan malfini plane nan syèl la, se jan koulèv mache sou wòch, se jan bato kouri sou lanmè, se jan gason ak fanm rive fè lamou. ²⁰Men ki jan fanm k'ap twonpe mari yo fè: Lè yo fin fè sa y'ap fè a, yo benyen byen pwòp, epi yo di: Mwen pa fè anyen ki mal. ²¹Gen twa bagay ki fè latè tranble. Sa m'ap di la a! Gen kat bagay moun pa ka sipòte. ²²Men yo: Se yon esklav ki rive chèf, se yon moun sòt ki gen tou sa li bezwen, ²³se yon fanm ki pa t' janm jwenn moun renmen l' epi ki resi mare yon nòs, se yon sèvant ki pran plas metrès li. ²⁴Gen kat ti bèt sou latè, gen lespri pase yo nanpwen: ²⁵Se foumi: yo tou fèb, men yo pase tout sezon chalè ap fè pwovizyon mete la. ²⁶Se chat mawon: yo pa pi fò pase sa. Men, yo fè kay yo nan twou wòch. ²⁷Se krikèt vèt: yo pa gen chèf, men yo mache pa bann. ²⁸Se zandolit: ou ka pran yo nan men ou. Men, ou jwenn yo nan palè wa yo. ²⁹Gen twa bagay ki bèl lè y'ap mache. Sa m'ap di la a! Gen kat bagay ki gen bèl demach: ³⁰Se lyon, se li ki pi fò nan tout zannimo, li pa pè yo yonn. ³¹Se bouk kabrit. Se chwal sele bride. Se wa lè y'ap mache devan lame yo. ³²Si ou te sòt jouk pou ou te rive fè grandizè, kalkile sou sa ou fè a: Pe bouch ou! ³³Si ou bat lèt, l'ap fè bè. Si ou frape yon moun sou men l', l'ap senyen. Si ou nan pouse dife, ou nan gwo kont.

Pwovèb 31

¹Men Pawòl wa Lemwèl, men konsèy manman l' te ba li: ²Kisa pou m' di ou, pitit mwen, pitit ki soti nan zantray mwen? Se mwen ki te mande Bondye pou l' ban mwen ou. Kisa pou m' di ou? ³Pa gaspiye kouray ou nan fanm. Veye zo ou ak fanm k'ap fè malè chèf yo. ⁴Lemwèl monchè, yon wa pa fèt pou nan bwè bweson. Chèf pa fèt pou nan bwè gwòg. ⁵Lè yo bwè konsa, yo bliye lòd yo te bay. Yo p'ap pran ka malere yo. ⁶Se moun ki dekouraje ak lavi ki tonbe nan gwòg. Se moun ki gen gwo lapenn nan kè yo ki lage kò yo nan bweson. ⁷Yo bwè pou yo bliye mizè yo, pou yo pa chonje lapenn yo. ⁸Louvri bouch ou pale pou moun ki pa ka pale pou tèt yo. Defann kòz moun ki san sekou yo. ⁹Pale pou yo. Pa fè patipri. Defann kòz malere yo ak endijan yo. ¹⁰Sa pa fasil pou moun jwenn yon bon madanm. Lè li jwenn li, li gen plis valè pase yon boul lò. ¹¹Mari l' mete tout konfyans li nan li. Tout bagay ap mache byen lakay li. ¹²Madanm lan p'ap janm aji mal ak mari l', l'ap pase tout lavi l' ap fè l' byen. ¹³Li chache lenn mouton ak fil swa, li travay yo fè twal ak men l'. ¹⁴Tankou bato k'ap pote machandiz, li al byen lwen chache manje mete nan kay la. ¹⁵Solèy poko leve, li gen tan sou pye l', l'ap pare manje pou moun nan kay la. L'ap di sèvant yo sa pou yo fè. ¹⁶Li fè lide sou yon tè, li achte l' ak lajan li fè ak men l'. Li fè jaden rezen sou li. ¹⁷Li mare ren l', li twouse manch rad li pou l' travay. ¹⁸Li santi zafè l' ap mache byen, li rete byen ta lannwit ap travay. ¹⁹Li file koton, li koud rad li. ²⁰Li lonje men l' bay pòv. Li pran ka malere. ²¹Li pa pè fredi pou moun lakay li, paske tout moun gen rad cho pou mete sou yo. ²²Li fè kouvèti lenn pou kabann yo. Tout rad li yo fèt ak twal wouj tise byen sere. ²³Mari l', se yonn nan chèf fanmi lavil la. Tout moun lavil la ap nonmen non l' an byen. ²⁴Madanm li fe rad pou l' vann, li fè bèl senti, li vann yo ak machann. ²⁵Li gen anpil kouraj, tout moun respekte l', li pa pè denmen. ²⁶Lè li louvri bouch li, se bon konsèy li bay. Li toujou gen bon pawòl nan bouch li. ²⁷Li konnen vire tounen tout moun nan kay la. Li toujou gen yon bagay l'ap fè. ²⁸Tout pitit li yo ap fè l' konpliman. Mari l' menm ap fè lwanj li. ²⁹L'ap di: Mwen konnen anpil madanm. Men ou menm, nanpwen tankou ou! ³⁰Bèl fanm pa di bon madanm pou sa. Bèl figi pa la pou lontan. Men, y'a fè lwanj yon fanm ki gen krentif pou Seyè a. ³¹Ba li sa ki pou li a. Lè y'a wè sa l' fè, se pou tout moun fè lwanj li.