Jòb 35–38

Jòb 35

¹Eliyou pran lapawòl ankò, li di: ²-Pa konprann ou gen rezon lè w'ap di ou inonsan devan Bondye, ³lè w'ap di Bondye: Ki mele ou sa? M' te mèt peche, sa pa fè ou anyen. ⁴Enben. Mwen pral reponn ou, ni ou ni zanmi ou yo. ⁵Gade syèl la! Ou wè jan nwaj yo wo anwo tèt ou! ⁶Si ou fè peche, sa pa fè Bondye anyen! Ou te mèt fè peche sou peche, sa pa di l' anyen? ⁷Si ou mache dwat, ki avantaj Bondye jwenn nan sa? Kisa ou ba li la a? ⁸Se moun parèy ou ki soufri lè ou fè sa ki mal. Se yo ki pwofite tou lè ou fè sa ki dwat. ⁹Lè moun ap sibi anba ponyèt lòt moun, yo plenyen. Lè se chèf k'ap peze yo, yo rele. ¹⁰Men, yo pa vire kote Bondye ki kreye yo a. Yo te mèt nan nenpòt gwo lapenn, se li menm k'ap ba yo kouraj. ¹¹Yo pa vire kote Bondye ki ba yo plis lespri pase bèt nan bwa, plis bon konprann pase zwezo nan syèl la. ¹²Yo rele kont rele yo, Bondye pa reponn yo, paske mechan yo gen lògèy. ¹³Se pou gremesi y'ap plede rele konsa. Bondye pa tande, li pa wè. ¹⁴Jòb monchè, ou di ou pa ka wè Bondye. Men, ou mete ka ou devan li. ¹⁵Ou di ankò: Bondye pa nan pini. Mwen te mèt peche, sa pa di l' anyen. ¹⁶Jòb monchè, w'ap louvri bouch ou pou ou pa di anyen. W'ap fè tout pale anpil sa a paske ou pa konn sa w'ap di.

Jòb 36

¹Eliyou pran pale ankò, li di konsa: ²-Pran yon ti pasyans. Kite m' fè yon ti pale ankò, paske m' poko fin di sa m' gen pou m' di pou pran defans Bondye. ³Mwen pral sèvi ak tou sa mwen konnen pou m' moutre ou se Bondye ki kreye m' lan ki gen rezon. ⁴Mwen p'ap bay manti nan sa m'ap di la a. Se yon nonm ki gen anpil konesans k'ap pale avè ou la a. ⁵Bondye gen pouvwa. Li pa meprize pesonn. Pa gen anyen li pa konprann. ⁶Li p'ap kite mechan yo viv lontan. Li toujou aji ak pòv yo san patipri. ⁷Li defann kòz moun ki mache dwat yo. Li mete yo chèf pou yo gouvènen tankou wa. Toutan tout moun ap pale byen pou yo. ⁸Men, si Bondye mete yo nan chenn, si lafliksyon makònen nan tout kò yo, ⁹Bondye va louvri je yo pou yo ka wè tou sa y'ap fè a. Li moutre yo se lògèy k'ap fè yo fè peche. ¹⁰Li pale nan zòrèy yo pou avèti yo. Li mande yo pou yo sispann fè sa ki mal. ¹¹Si yo koute Bondye, si yo soumèt devan li, y'a viv rès lavi yo nan kè kontan ak nan plezi. ¹²Si se pa sa, y'ap rete konsa y'ap mouri. Y'ap desann kote mò yo ye a san yo pa konnen. ¹³Men, mechan yo ap fè tèt di. Yo fache pi rèd. Yo te mèt anba kou, yo p'ap mande sekou. ¹⁴Yo jenn gason toujou, yo gen tan mouri. Yo t'ap mennen yon lavi dezòd. ¹⁵Men, Bondye pran soufrans lan, li sèvi avè l' pou li moutre lèzòm anpil bagay. Se lè yo anba tray, li louvri lespri yo. ¹⁶Ou menm tou, Bondye vle wete ou nan gwo lapenn sa a, pou ou ka rive gen jwisans san moun pa chache ou kont. Te gen yon lè tab ou te chaje ak bon manje. ¹⁷Lè sa a, ou te fè menm lide ak mechan yo. Koulye a, yo pral pini ou jan ou merite l' la. ¹⁸Veye zo ou! Pa kite richès vire tèt ou ankò! Pa kite yo achte ou ak lajan osinon ak gwo kado! ¹⁹Se pou ou jije tout moun, rich kou pòv, gwonèg la tankou nèg fèb la. ²⁰Pa kraze moun ki pa anyen pou ou pou mete fanmi ou nan plas yo. ²¹Atansyon pou ou pa fè sa ki mal. Se pou sa menm w'ap soufri konsa. ²²Gade jan Bondye gen anpil pouvwa. Pa gen pi gran mèt pase l'. ²³Pesonn pa ka di Bondye sa pou l' fè. Pesonn pa ka di l' sa l' fè a mal. ²⁴Se pou ou fè lwanj travay li pito, tankou tout moun toujou fè l' la. ²⁵Se bèl bagay pou tout moun wè. Yo rete byen lwen, y'ap gade. ²⁶Wi. Nou p'ap janm ka fin konprann jan Bondye gen pouvwa! Nou p'ap janm ka fin konnen depi kilè Bondye la. ²⁷Se li menm ki rale dlo sou latè, ki fè l' tounen vapè nan nwaj yo pou bay lapli. ²⁸Lèfini, li kite lapli soti nan syèl la tonbe sou tout moun sou latè. ²⁹Pesonn pa konnen ki jan nwaj yo fè deplase, ki jan loraj fè gwonde nan syèl kote Bondye rete a. ³⁰Li kouvri syèl la ak nwaj yo. Li kouvri tout tèt mòn yo. ³¹Se konsa li bay pèp la manje. Li ba yo manje an kantite. ³²Li kenbe zèklè yo nan pla men li. Li bay lòd pou loraj tonbe kote li menm li vize a. ³³Loraj la anonse move tan. Ata bèt yo santi move tan an ap vini.

Jòb 37

¹Lè konsa, kè m' ap bat. M' santi l'ap rache. ²Nou tout, koute vwa Bondye! Koute jan l'ap gwonde! ³Zèklè a kouri nan tout syèl la. Li klere dènye bout latè. ⁴Apre sa, yo tande vwa li ap gwonde. Loraj la gwonde avèk fòs. Lè konsa, zèklè fè mikalaw. ⁵Lè Bondye ap pale konsa, li fè bèl bagay, bagay nou pa ka konprann. ⁶Li bay lanèj lòd kouvri latè. Li bay gwo lapli lòd tonbe. ⁷Li fè tout moun sispann travay. Li fè yo wè sa se travay pa l'. ⁸Tout bèt antre nan twou. Y' al kache kò yo nan nich. ⁹Van tanpèt soti nan sid. Van frèt soti nan nò. ¹⁰Souf Bondye fè dlo tounen glas. Konsa, tout dlo tounen glas. ¹¹Zèklè yo ap fè yan nan nwaj yo. Nwaj yo klere byen lwen. ¹²Bondye fè yo vire nan syèl la jan li vle. Yo fè tou sa li ba yo lòd fè toupatou sou latè. ¹³Bondye voye lapli pou wouze latè. Li voye l' pou pini moun, li voye l' pou beni yo tou. ¹⁴Louvri zòrèy ou, Jòb, pou ou tande sa m' pral di la a. Pran tèt ou, egzaminen bèl travay Bondye yo byen. ¹⁵Eske ou konnen ki jan Bondye ba yo lòd, ki jan li fè zèklè yo klere nan nwaj yo? ¹⁶Eske ou konnen ki jan nwaj yo fè flote nan syèl la? Sa se yon bèl bagay. Pou ou fè l' fòk ou gen anpil ladrès. ¹⁷Lè van cho ki soti nan sid la ap kwit tè a, ou santi rad sou ou ap boule tout kò ou. ¹⁸Eske ou ka ede Bondye louvri nwaj yo nan syèl la, pou fè yo di tankou bout fè? ¹⁹Fè m' konnen sa pou nou di Bondye. Lespri nou vid. Nou pa gen anyen pou nou di l'. ²⁰Mwen pa mande pou m' pale ak Bondye. Poukisa pou m' ba li okazyon pou li touye m'? ²¹Ou rete konsa ou pa wè solèy la. Li kache anba nwaj yo. Yon van leve, li fè solèy la klere ankò. ²²Yon bèl klète, klere kou lò, parèt sou bò nò. Nou wè Bondye kanpe nan mitan yon bèl limyè ki fè nou pè. ²³Nou pa ka pwoche bò kote Bondye ki gen tout pouvwa a. Li sèl gwo chèf, li sèl jij, li pa nan patipri. Li p'ap kondannen yon moun ki inonsan. ²⁴Se poutèt sa, tout moun fèt pou gen krentif pou li. Li p'ap okipe moun ki pretann yo gen bon konprann.

Jòb 38

¹Lè sa a, nan yon gwo van tanpèt, Seyè a pale ak Jòb. Li di l' konsa: ²-Kisa ou ye menm pou w'ap poze keksyon sou plan travay mwen ak yon bann diskou ki pa vle di anyen? ³Mete gason sou ou! M' pral poze ou keksyon. Pare kò ou pou ou reponn mwen. ⁴Kote ou te ye lè m' t'ap fè latè? Se pou ou reponn mwen si ou konn tout bagay! ⁵Ki moun ki te deside lajè l'ap genyen? Ki moun ki te pran mezi l'? Eske ou konn sa? ⁶Sou kisa fondasyon latè chita? Ki moun ki te poze wòch ki kenbe l' la? ⁷Jou maten sa a, tout zetwal yo t'ap chante, tout sèvitè Bondye yo t'ap bat bravo. ⁸Ki moun ki fèmen pòtay pou bare lanmè a, lè li pete soti nan vant latè a? ⁹Lè mwen kouvri lanmè a ak nwaj, lè mwen vlope l' nan gwo nwaj nwa yo, ¹⁰mwen bay lanmè a bòn li. Mwen mete pòt avèk kle pou kenbe l' nan plas li. ¹¹Mwen di l': Men limit ou. Pa depase l'. Se la m'ap kraze fòs lanm ou yo. ¹²Jòb, èske yon sèl fwa ou janm bay lòd pou maten rive? Ou janm bay lè pou bajou kase? ¹³Eske ou janm bay devanjou l' lòd pou l' klere sou tout latè, l' pou l' fè mechan yo soti nan twou yo? ¹⁴Lè sa a, tout mòn yo ak tout fon yo parèt aklè, tankou mak pye bèt nan labou. Yo pran koulè yo, ou ta di yon rad latè mete sou li. ¹⁵Limyè solèy la antrave mechan yo nan travay yo. Yo blije kite mechanste yo te pare pou fè a. ¹⁶Eske ou te desann jouk kote sous lanmè a pete a? Eske ou te mache nan fon lanmè a? ¹⁷Eske yo te janm moutre ou pòtay peyi lanmò a? Eske ou te janm wè pòt ki louvri sou gwo twou san fon an? ¹⁸Eske ou gen lide ki lajè latè a genyen? Reponn mwen non, si ou konnen! ¹⁹Eske ou konnen ki bò limyè soti, ki bò fènwa rete, ²⁰pou ou ka moutre yo jouk ki bò pou yo ale, osinon pou ou voye yo tounen lakay yo? ²¹Si ou konn sa, enben, ou te fèt deja lè mwen t'ap kreye yo a. Ou pa manke gen laj sou tèt ou! ²²Eske ou janm rive kote yo fè depo lanèj lan? Ou janm wè depo lagrèl la? ²³Ou konnen depo kote m' sere yo pou lè gen move tan, pou lè batay ak lagè ap fèt? ²⁴Ou konnen ki bò solèy la leve, ki bò van lès la soti pou l' soufle sou latè? ²⁵Ou konnen ki moun ki fè wout bay lapli tonbe, ki moun ki fè chemen pou loraj la, ²⁶pou lapli tonbe sou dezè a kote moun pa rete, ²⁷pou wouze tè sèk k'ap fann nan solèy, pou fè zèb pouse nan savann? ²⁸Eske lapli a gen papa? Ki moun ki fè lawouze? ²⁹Ki bò moso glas yo soti? Lagrèl ki soti nan syèl la, ki moun ki manman l'? ³⁰Se yo menm ki fè dlo vin di kou wòch, ki fè tout dlo anwo lanmè a di kou wòch? ³¹Ou ka mare zetwal Lapousiyè yo ansanm? Ou ka lage kòd ki kenbe zetwal Oryon yo ansanm? ³²Ou ka mennen zetwal yo soti lè lè yo rive? Ou ka bay Gwo Kabwèt la ak Ti Kabwèt la direksyon pou yo pran? ³³Ou konnen lwa k'ap gouvènen tout bagay nan syèl la? Eske ou ka sèvi ak lwa sa yo pou gouvènen sa k'ap pase sou latè? ³⁴Eske ou ka bay nwaj yo lòd pou yo voye gwo lapli sou ou? ³⁵Si ou bay zèklè yo lòd pou yo pati, èske y'ap reponn ou: Wi, men nou? ³⁶Ki moun ki penmèt krabye konprann lè pou li anonse dlo pral desann fè inondasyon? Ki moun ki fè gwo zwezo sa a konnen lè lapli pral tonbe? ³⁷Ki moun ki ka konte kantite nwaj ki genyen, san manke yonn? Ki moun ki ka panche yo pou vide dlo lapli, ³⁸pou pousyè tè a tounen labou, pou boul tè yo kole ansanm? ³⁹Eske se ou ki jwenn manje pou bay lyon yo manje? Eske ou bay ti lyon yo manje plen vant yo, ⁴⁰kote yo kache nan twou yo a, osinon kote yo kouche ap tann nan nich yo a? ⁴¹Ki moun ki pare manje pou kònèy yo, lè grangou fè yo soti nan nich yo, lè pitit yo ap rele nan pye m' pou m' ba yo manje?