Jòb 31–34

Jòb 31

¹Mwen te fè sèman pou m' pa janm gade yon jenn fi avèk move lide. ²Kisa Bondye ki anwo a ap fè nou konsa? Kisa Bondye ki gen tout pouvwa a sere pou nou? ³Li voye malè pou moun ki pa mache dwat. Li voye tribilasyon pou moun k'ap fè mechanste. ⁴Eske Bondye pa konnen tou sa n'ap fè? Eske li pa wè tout vire tounen m'? ⁵Eske mwen janm nan bay manti? Eske mwen janm chache twonpe moun? ⁶Se pou Bondye peze m' nan bon balans li a. Se pou Bondye wè jan m' toujou mache dwat. ⁷Si mwen janm pran chemen kwochi pou mwen, si mwen te kite lanvi anvayi kè m', si mwen janm mete men m' nan sa ki mal, ⁸se pou lòt moun rekòlte sa mwen plante. Se pou yo rache tout ti plant k'ap pouse nan jaden m'. ⁹Si mwen te kite yon lòt fanm pran tèt mwen, pou m' al kache devan pòt yon frè mwen ap veye, ¹⁰se pou madanm mwen fè manje pou yon lòt gason. Se pou lòt gason kouche avè l'. ¹¹Se yon gwo bagay sal mwen ta fè la a. Se bagay pou yo ta touye m'. ¹²Se ta tankou yon gwo dife mwen limen pou fini avè m' nèt. Li ta boule dènye sa m' genyen. ¹³Lè domestik mwen osinon sèvant mwen gen kont avè m', si mwen ta refize mete rezon an kote l' ye a, ¹⁴kisa mwen ta fè, lè Bondye parèt devan m'? Lè l'a mande m' kont, kisa m'a reponn li? ¹⁵Menm Bondye ki fè m' nan vant manman m' lan, se li menm tou ki fè yo nan vant manman pa yo. Se li menm ki kreye nou tout. ¹⁶Mwen pa janm refize ede yon pòv. Ni mwen pa janm kite vèv yo nan nesesite. ¹⁷Mwen pa janm kite timoun san papa yo rete grangou pou m'ap manje manje m' pou kont mwen. ¹⁸Okontrè, depi m' fèt, m' sèvi ak timoun sa yo tankou papa ak pitit. Depi m' soti nan vant manman m', m'ap pran swen vèv yo. ¹⁹Lè m' jwenn yon malere toutouni osinon yon pòv endijan san yon bout dra, ²⁰mwen ba yo rad pou mete sou yo, mwen pran lenn sou do mouton m' pou m' ba yo chofe. ²¹Si m' te janm aji mal ak yon timoun san papa paske mwen konnen y'a toujou ban m' rezon nan tribinal, ²²enben, se pou zepòl mwen dejwente, se pou de bra m' kase. ²³Paske, mwen pè jijman Bondye. Mwen pa ka kanpe devan l'. ²⁴Mwen pa janm mete konfyans mwen nan lò pou m' ta di se sa k'ap pwoteje m'. ²⁵Mwen pa janm vante tèt mwen dèske mwen gen anpil byen, dèske mwen fè anpil lajan ak men mwen. ²⁶Mwen pa janm adore solèy ak lalin lè yo klere byen bèl nan syèl la. ²⁷Mwen pa janm pèdi tèt mwen pou m' sèvi yo an kachèt. ²⁸Sa a tou, yo ta mèt touye m' si m' ta fè l', paske mwen ta nye Bondye ki gen tout pouvwa a. ²⁹Mwen pa janm kontan lè lènmi m' ap soufri. Mwen pa janm fè fèt lè malè tonbe sou yo. ³⁰Mwen pa janm kite bouch mwen chape pou m' ta ba yo madichon, pou m' ta rive mande lanmò pou yo. ³¹Tout moun k'ap viv nan kay avè m' konnen mwen toujou byen resevwa tout moun lakay mwen. ³²Vwayajè pa janm dòmi deyò nan lari. Pòt kay mwen toujou louvri pou yo. ³³Mwen pa janm kache peche m' pou pesonn. Ni mwen pa janm fè sa ki mal an kachèt. ³⁴Mwen pa janm pè sa moun ap di. Mwen pa janm pè louvri bouch mwen ni pè mete pwent tèt mwen deyò, paske mwen ta pè pou moun pa lonje dwèt sou mwen. ³⁵Pa gen pesonn pou koute sa m'ap di la a? Mwen fin di sa pou m' di a. Koulye a, se Bondye ki pou reponn mwen. Si moun ki pa vle wè m' lan ta voye papye nan tribinal pou mwen, ³⁶mwen ta pote papye sa a sou zepòl mwen san ankenn wont. Mwen ta mare l' sou tèt mwen, tankou yon kouwòn. ³⁷Mwen ta di Bondye dènye sa mwen fè. Mwen ta kenbe tèt mwen dwat devan l'. ³⁸Si se vòlò mwen te vòlò tè m'ap travay la kifè koulye a tè a ap mande m' kont, ³⁹si mwen te manje rekòt jaden an san peye travayè yo kifè koulye a y'ap pote plent pou mwen, ⁴⁰enben, se pikan ak chadwon ki pou leve nan jaden m' kote ble ak lòj te konn pouse. Se konsa Jòb te fin pale.

Jòb 32

¹Jòb te sitèlman sèten li te inonsan, twa mesye yo kite sa, yo pa chache reponn li ankò. ²Men, Eliyou ki te kanpe la fè yon sèl kòlè. Eliyou sa a, se pitit Barakèl, moun fanmi Bouz, nan branch fanmi Ranm lan. Li fè yon sèl kòlè sou Jòb, paske Jòb t'ap bay tèt li rezon, li t'ap bay Bondye tò. ³Li te ankòlè sou twa zanmi Jòb yo tou. Yo pa t' jwenn anyen pou yo reponn Jòb. Konsa, yo menm tou, se Bondye yo te bay tout tò a. ⁴Antan yo twa a t'ap pale, Eliyou te rete la san di anyen, paske yo te pi gran pase l'. ⁵Lè li wè mesye yo pa t' jwenn anyen ankò pou reponn Jòb, li fè yon sèl kòlè. ⁶Li pran lapawòl, li di konsa: -Mwen menm, se jenn gason mwen ye. Nou menm, se granmoun nou ye. Se poutèt sa mwen te yon ti jan wont. Mwen te pè antre nan koze a. ⁷Mwen t'ap di nan kè m': Kite granmoun pale! Kite sa ki gen laj sou tèt yo mete bon konprann yo deyò. ⁸Men, pou di vre, se lespri Bondye ki gen tout pouvwa a sèl ki pou antre nan tèt yon moun pou ba li bon konprann! ⁹Se pa laj ki bay moun bon konprann. Se pa cheve blan ki fè moun konnen sa ki dwat. ¹⁰Koulye a, mwen ta renmen nou koute m'. Kite m' di nou sa m' konnen sou koze a. ¹¹Mwen tande byen tande tou sa nou di. Mwen te louvri zòrèy mwen gran louvri pou m' pa manke anyen nan pawòl nou yo, pandan n'ap chache mo pou nou di. ¹²Mwen t'ap swiv sa n'ap di. Men, yonn nan nou pa rive fè Jòb fèmen bouch li. Nou yonn pa rive demanti msye. ¹³Pa vin di m' nou konprann koulye a se Bondye ki pou reponn. Lèzòm pa kapab. ¹⁴Se avè nou Jòb t'ap pale. Se pa avè m'. Konsa, mwen pral reponn msye yon lòt jan. ¹⁵Jòb, ou wè mesye yo pa konn sa pou yo di ou. Yo pa jwenn anyen pou reponn ou ankò. ¹⁶Mwen t'ap tann yo. Men, koulye a yo fèmen bouch yo. Yo sispann pale, yo pa reponn ou. ¹⁷Atòkile, se mwen ki pral pale, mwen pral di ou sa m' konnen nan koze a. ¹⁸Mwen plen pawòl nan bouch mwen. Si m' pa pale m'a toufe. ¹⁹Pawòl ki nan tèt mwen, ou ta di yon diven k'ap fèmante. Li prèt pou pete veso kote l' ye a. ²⁰Se pou m' pale pou m' ka soulaje konsyans mwen. Se pou m' louvri bouch mwen reponn ou. ²¹Mwen p'ap pran defans pyès moun. Mwen pa pral achte figi nou yonn la a. ²²Mwen pa konn flate moun. Lèfini, si m' ta fè sa, Bondye ki kreye m' lan ta disparèt mwen lapoula.

Jòb 33

¹Atòkile, Jòb, tanpri, koute sa m'ap di ou. Louvri zòrèy ou byen pou ou tande m'. ²M' pare pou m' di dènye sa ki vin nan bouch mwen. ³M' pral di tou sa ki nan kè m'. Se verite a tou senp mwen pral pale. ⁴Se lespri Bondye a ki fè m'. Se souf Bondye ki gen tout pouvwa a ki ban m' lavi. ⁵Si ou kapab, w'a reponn mwen. Pare kò ou. Pran pozisyon batay ou avè m'. ⁶Ou menm avè m', devan Bondye nou tout se menm. Nou tou de, se ak labou li fè nou. ⁷Ou wè! Ou pa bezwen pè m'! Mwen pa ka fè ou anyen! ⁸Mwen te tande ou ak de zòrèy mwen. Ki jan ou fè ka di: ⁹Mwen menm, mwen inonsan. M' pa fè ankenn peche! M' pa gen anyen sou konsyans mwen. ¹⁰Men, se Bondye ki pretann mwen ba l' jwen pou l' atake m'. Se li menm k'ap aji avè m' tankou si mwen te lènmi l'. ¹¹Li mete de pye m' nan sèp. L'ap veye tou sa m'ap fè. ¹²La, Jòb monchè, m'ap reponn ou: ou antò. Paske Bondye pa kanmarad moun. ¹³Poukisa w'ap chache Bondye kont konsa? Se paske li pa reponn lè w'ap plenyen nan pye l'? ¹⁴Bondye pale divès jan. Men, pesonn pa okipe sa l'ap di. ¹⁵Lè moun kouche nan kabann yo, lè yo fon nan dòmi lannwit, Bondye pale ak yo nan rèv, nan vizyon. ¹⁶Li fè yo konnen sa li gen pou l' di yo. Li ba yo avètisman pou yo mache sou piga yo. ¹⁷Li vle pou yo kite move chemen y'ap swiv la, pou yo pa kite lògèy vire tèt yo. ¹⁸Konsa, yo p'ap mouri. Y'a sove lavi yo. ¹⁹Bondye avèti moun tou lè li voye maladi sou yo. Li ba yo doulè nan tout kò yo. ²⁰Li bay yo degoutans manje. Yo pèdi anvi manje menm lò manje a gou. ²¹Y'ap depafini, tout moun wè jan y'ap vin mèg. Tout zo nan kò yo griyen. ²²Sa ki rete pou yo mouri a, pou y' ale nan peyi san chapo a pa anyen. ²³Lè sa a, yon zanj Bondye ka vin bò kote l', yonn nan milyonven zanj Bondye yo ki la pou fè moun chonje devwa yo. ²⁴Zanj lan va gen pitye pou li. L'a di Bondye: -Tanpri, pa kite l' mouri. M'ap peye pou sove lavi li. ²⁵Kò li va refè, l'a vin fre tankou lè l' te jenn. ²⁶Li lapriyè Bondye, Bondye reponn li. li al adore Bondye ak kè kontan. Bondye padonnen l' devan tout moun. ²⁷L'ap mache bay Bondye lwanj toupatou. L'ap di: -Mwen te peche, mwen te fè sa ki mal. Men, Bondye pa fè m' peye pou sa m' te fè a. ²⁸Li egzante m' lanmò. Li ban m' lavi ankò. ²⁹Men tou sa Bondye ap fè, de fwa, twa fwa pou lèzòm, ³⁰pou l' pa kite yo mouri, pou l' ba yo lavi ak kè kontan. ³¹Koulye a, Jòb, louvri zòrèy ou! Koute byen sa m'ap di! Pe bouch ou la! Kite m' fin pale! ³²Men, si ou gen kichòy ou vle di, pale; m'ap koute ou. Paske mwen ta vle ba ou rezon. ³³Osinon, pe bouch ou, koute m' pito! Kite m' moutre ou sa ki rele gen bon konprann.

Jòb 34

¹Eliyou pran lapawòl ankò. Li di konsa: ²-Nou menm moun lespri yo, koute sa m'ap di nou! Nèg save yo, louvri zòrèy nou! ³Zòrèy konnen lè pawòl bèl menm jan bouch konnen lè manje gou. ⁴Annou wè kote jistis la ye. Ann mete rezon an kote pou l' ye a. ⁵Jòb pretann li nan dwa li, se Bondye ki derefize rann li jistis. ⁶Li di: Si m' di m' antò, se manti m'ap bay. Mwen malad pou m' mouri. Men, m' pa fè anyen ki mal. ⁷Ou janm jwenn yon moun tankou Jòb? L'ap pase verite Bondye a nan betiz alèz tankou si se dlo l'ap bwè. ⁸Li fè bann ak moun k'ap fè mechanste yo. L'ap pwonmennen ansanm ak malveyan yo. ⁹Se li menm menm ki di ak bouch li: Sa pa rapòte anyen, lè yon moun ap chache fè volonte Bondye. ¹⁰Nou menm ki gen lespri, koute sa m'ap di. Bondye pa ka fè mechanste. Bondye ki gen tout pouvwa a pa ka nan patipri. ¹¹Li bay chak moun sa yo merite dapre sa yo fè. Li aji ak yo dapre jan yo mennen bak yo. ¹²Non! Bondye pa janm fè sa ki mal. Bondye ki gen tout pouvwa a pa nan paspouki. ¹³Se pa yon lòt moun ki te bay Bondye pouvwa pou l' gouvènen latè, ni se pa yon lòt moun ki te mete tou sa ki egziste sou kont li. ¹⁴-(we vèsè pwochen) ¹⁵Si Bondye te kenbe souf ki bay lavi a pou tèt li, yon sèl kou a, bèt kou moun ta mouri. Yo ta tounen pousyè tè ankò. ¹⁶Si nou gen bon konprann, koute sa byen. Louvri zòrèy nou pou nou tande sa m'ap di. ¹⁷Eske n'ap kondannen Bondye ki gen tout pouvwa a, epi k'ap rann jistis la? Eske yon moun ki pa vle wè jistis ka gouvènen? ¹⁸Bondye pini wa yo lè yo fè sa ki mal. Li pini gwo chèf yo lè yo fè mechanste. ¹⁹Li pa nan achte figi chèf yo. Ou te mèt pòv, ou te mèt rich, pa gen diferans pou li, paske se li menm ki fè yo tout. ²⁰Yo rete konsa yo mouri, yo ale nan mitan lannwit. Pèp la annik souke kò l', yo disparèt. Bondye touye gwo chèf yo san li pa leve ti dwèt li. ²¹L'ap veye tout vire tounen lèzòm. L'ap gade tout kote y'ap mete pye yo. ²²Pa gen ankenn fènwa, ni ankenn lonbray ki ka anpeche l' wè sa mechan yo ap fè. ²³Li pa bezwen voye manda bay moun pou yo prezante devan l' pou l' jije yo. ²⁴Li pa bezwen nan chache konnen pou l' kraze chèf yo, lèfini pou l' mete lòt moun nan plas yo. ²⁵Paske li konnen dènye sa yo fè. Yon jou lannwit konsa, li desann yo li pilonnen yo anba pye l'. ²⁶Li souflete yo tankou malfektè nan mitan lari pou tout moun ka wè. ²⁷Paske yo te vire do ba li, yo te fè tankou yo pa konnen lòd li bay yo. ²⁸Yo fè, yo fè jouk pòv yo rele mande Bondye sekou, jouk Bondye tande jan piti yo ap rele anba men yo. ²⁹Men, si Bondye rete san l' pa fè anyen, ki moun ki ka di l' kichòy? Si li kache kò li, ki moun ki ka wè l'! Men, pa pè! L'ap veye sou tout moun nan tout peyi. ³⁰Li p'ap kite move chèf gouvènen yo, li p'ap kite yo tann pèlen pou pèp la. ³¹Men, si yon mechan pale ak Bondye, si li di l': -Wi, mwen te fè sa ki mal. Mwen p'ap fè sa ankò. ³²Tanpri. Louvri je m'. Fe m' wè sa m' fè a. Si mwen te aji ak mechanste, mwen p'ap rekonmanse ankò. ³³Dapre ou, Jòb, èske se pou Bondye pini l'? Mwen mande ou sa paske m' konnen ou pa dakò ak sa Bondye fè a. Men, se ou menm ki pou deside. Pa mwen menm. Manyè di m' sa ki nan kè ou. ³⁴Moun lespri ansanm ak moun bon konprann k'ap koute m' yo va di m' konsa: ³⁵Jòb ap pale anpil, men li pa konn sa l'ap di. Tou sa l'ap di yo pa gen ni pye ni tèt. ³⁶Egzaminen byen tou sa Jòb di la a. N'a wè li pale tankou yon moun ki mechan nan kè l'. ³⁷Li fin fè kont peche l', koulye a l'ap kenbe tèt ak Bondye. L'ap seye fè nou konprann li pa antò. L'ap plede fè Bondye remontrans.