Jòb 39–42

Jòb 39

¹Eske ou konnen lè kabrit mawon yo ap fè pitit? Eske ou janm wè kote fenmèl yo ap miba? ²Eske ou konnen konbe mwa yo pote yon pitit nan vant yo? Kilè pitit yo rive dat pou yo fèt? ³Eske ou konnen lè yo pral kwoupi pou miba, lè y'ap fè pitit yo nan mitan dezè a? ⁴Pitit yo grandi, yo pran fòs, yo kite manman yo, y' ale, yo pa tounen. ⁵Ki moun ki bay bourik mawon libète yo? Ki moun ki lage yo nan savann? ⁶Mwen ba yo dezè pou kay yo. Mwen kite yo viv nan savann tè sale a. ⁷Tout bri k'ap fèt nan lavil yo pa di yo anyen. Pesonn pa ka donte yo pou fè yo travay. ⁸Yo mache nan tout mòn yo dèyè manje. Y'ap chache fèy vèt pou yo mete anba dan yo. ⁹Eske ou ka fè bèf mawon travay pou ou? Eske l'ap rete pase nwit mare nan lakou kay ou? ¹⁰Eske ou ka pase kòd nan kou yonn pou fè l' raboure tè a pou ou? Eske ou ka fè l' rale chari pou woule tè jaden ou yo? ¹¹Eske ou ka konte sou gwo fòs kouraj li pou fè li travay di pou ou? ¹²Eske ou kwè l'ap asepte pote rekòt ou soti nan jaden? Eske l'ap asepte ranmase grenn ou yo sou glasi? ¹³Otrich alèz lè l'ap bat zèl li, men, li pa ka vole tankou sigòy. ¹⁴Otrich la ponn ze l' yo atè konsa. Se chalè tè a ki fè yo kale. ¹⁵Li pa konnen nenpòt moun k'ap pase ka pile yo, nenpòt bèt nan raje ka kraze yo anba pye. ¹⁶Li fè tankou ze yo pa pou li. Sa pa di l' anyen si li bay tèt li tout lapenn ponn ze yo pou gremesi, ¹⁷Se mwen menm, Bondye, ki fè l' sòt konsa, ki pa ba li lespri menm. ¹⁸Men, lè l' pran kouri, nanpwen kavalye sou chwal ki ka pran devan l'. ¹⁹Eske se ou menm ki bay chwal yo fòs, ki mete bèl krenyen sou kou yo? ²⁰Eske se ou ki fè yo sote ponpe tankou kabrit, ki fè yo ranni pou fè moun pè? ²¹Y'ap pyafe konsa nan ti fon yo, y'ap bat tè a ak zago yo. Yo kouri ak tout fòs yo lè yo nan lagè. ²²Se brave danje yo ye. Yo pa janm pè anyen. Pa gen zam ki pou fè yo fè bak. ²³Lè konsa, ti sak flèch ki nan do kavalye yo ap fè bri. Lans ak frenn ki nan men yo ap fè zèklè. ²⁴Yo eksite, yo pa ka tann. Y'ap kouri sou lènmi an. Lè yo tande twonpèt la soufle, yo pa ka rete an plas. ²⁵Chak fwa twonpèt la soufle, yo fè han! Yo gen tan pran sant batay la byen lwen. Yo tande chèf yo k'ap pase lòd byen fò. ²⁶Eske se ou ki moutre grigri jan pou l' vole lè li louvri zèl li yo vole ale nan sid? ²⁷Eske se ou ki bay malfini lòd pou li fè nich li byen wo sou tèt mòn yo? ²⁸Li rete sou tèt gwo wòch yo. Se la li pase nwit. Kote l' ye a, moun pa ka vin pran l'. ²⁹Se la li rete, l'ap veye bèt pou l' trape manje. Li te mèt byen lwen, l'ap wè yo ak je li. ³⁰Se san bèt ti malfini yo bwè. Kote ki gen kadav, se la yo ye.

Jòb 40

¹Seyè a pale ak Jòb. Li di l' konsa: ²-Jòb monchè, ou menm ki t'ap kenbe tèt ak Bondye ki gen tout pouvwa a, ou p'ap kite pou li? Ou menm ki t'ap kritike Bondye a, ou vle reponn li koulye a? ³Jòb reponn Seyè a, li di l' konsa: ⁴-Mwen pa t' konn sa m' t'ap di. Kisa pou m' reponn ou? Se fèmen pou m' fèmen bouch mwen. ⁵Mwen pale twòp deja. Mwen pa gen anyen pou m' di ankò. ⁶Seyè a rete nan van tanpèt la, li pale ak Jòb ankò. Li di l': ⁷-Koulye a, kanpe! Mete gason sou ou! Mwen pral poze ou keksyon, se pou ou reponn mwen. ⁸Eske ou soti vre pou moutre se lenjistis m'ap fè ou? Se mwen menm ki antò, ou menm ou gen rezon? ⁹Eske ou gen menm fòs avè m'? Eske vwa ou ka gwonde tankou vwa pa m'? ¹⁰Si se konsa, kanpe non! Kenbe tèt ou byen dwat! Gade tout moun nan je! Mete chèf sou ou! Fè wè pouvwa ou! ¹¹Gade moun k'ap gonfle lestonmak yo nan je. Move sou yo! Kraze kouraj yo! ¹²Wi. Gade yo nan je. Fè yo bese tèt yo! Kraze mechan yo la kote yo ye a! ¹³Mete yo tout anba tè. Mare bouch yo tout nan twou kote mò yo ye a. ¹⁴Lè sa a, mwen menm, m'a fè lwanj ou, dèske avèk pwòp fòs ou ou te rive kraze yo. ¹⁵Gade gwo bèt lèd yo rele Beyemòt la. Se mwen ki fè l', menm jan se mwen ki fè ou. Se zèb li manje tankou bèf. ¹⁶Tout fòs li, se nan ren l'. Tout kouraj li, se nan venn vant li. ¹⁷Ke l' kanpe tankou yon pye sèd. Venn janm li yo fè boul. ¹⁸Zo l' yo di tankou fè tiyo. Janm li yo tankou de bout fè. ¹⁹Nan tout bèt mwen fè, se li ki pote premye pri. Se mwen ki kreye l' la sèlman ki ka fè l' bat ba. ²⁰Li manje zèb ki pouse sou mòn kote lòt bèt nan bwa ap pran plezi yo. ²¹Li kouche anba raje. Li kache nan mitan wozo marekay yo. ²²Raje yo fè lonbray pou li. Pye sikren bò larivyè yo ap pwoteje l'. ²³Larivyè ap desann, sa pa di l' anyen. Larivyè Jouden gonfle rive wotè bouch li, li kè pòpòz. ²⁴Ki moun ki ka pete je l' pou mete men sou li? Ki moun ki ka pèse bwa nen l' ak yon fwenn bwa.

Jòb 41

¹Eske ou ka pran levyatan an nan zen? Eske ou ka mare lang li ak yon kòd? ²Eske ou ka pase yon bwa wozo nan nen l'? Eske ou ka pèse machwè l' ak yon gwo zen? ³Eske li pral mande ou: Tanpri souple, kite m' ale? Eske l'ap pale dous avè ou? ⁴Eske l'ap pase kontra avè ou pou l' sèvi ou pou tout tan? ⁵Eske ou ka mare l' tankou yon ti zwezo pou pitit fi ou yo ka jwe avè l'? ⁶Eske moun k'ap fè lapèch yo pral fè lajan avè l'? Eske machann yo pral koupe l' an moso pou yo vann? ⁷Eske ou ka pike tout po kò l' ak fwenn? Eske ou ka pèse tèt li ak yon fwenn? ⁸Seye mete men ou sou li yon grenn fwa, ou p'ap janm fè sa ankò, lè w'a chonje sa l'a fè ou! ⁹Depi ou wè levyatan an, ou pèdi tout kouraj ou. Ou annik wè l', ou tonbe atè. ¹⁰Si yo leve l' nan dòmi, li move. Pa gen moun ki ka kanpe devan l'. ¹¹Ki moun ki ka atake l' san anyen pa rive l'? Pa gen moun sou latè ki ka fè sa. ¹²Mwen pa bezwen di ou anyen sou pa t' janm li yo. Men, m'a fè ou konnen pa gen bèt ki gen fòs pase l'. ¹³Pesonn pa janm rive dechire premye po li. Ni pesonn pa janm rive pèse karapas li. ¹⁴Ki moun ki janm fòse l' louvri bouch li? Dan nan bouch li, se bagay ki pou fè moun kouri. ¹⁵Tout do l', se yon seri gwo kal mare yonn ak lòt. Yo di kou wòch. ¹⁶Yo kole yonn ak lòt, yo fè yon sèl. Pa gen yon ti fant nan mitan yo pou lè pase. ¹⁷Yo sitèlman byen kole yonn ak lòt anyen pa ka separe yo. ¹⁸Lè l' estènen, limyè fè yan-yan. Je l' klere tankou solèy lè l'ap leve. ¹⁹Flanm dife ap soti nan bouch li. Tensèl dife ap vole soti ladan l'. ²⁰Lafimen ap soti nan tout twou nen l' tankou nan yon chodyè k'ap bouyi sou dife. ²¹Souf li ta ka limen bwa dife. Flanm dife ap soti nan bouch li. ²²Se nan kou li tout fòs li ye. Depi moun wè l', kè yo kase. ²³Po li fè kal kal sou tout kò li. Yo kole yonn ak lòt. Yo di kou wòch. ²⁴Kè li di kou wòch, li pa pè anyen. Li fèm kou wòl moulen. ²⁵Lè li leve kanpe, ata gwonèg yo pè. Yo kouri san gad dèyè. ²⁶Pa gen nepe ki ka blese l'. Ni fwenn, ni lans, ni flèch pa ka fè l' anyen. ²⁷Pou li, nenpòt bout fè lejè kou pay, nenpòt bout asye mou tankou bannann mi. ²⁸Pa gen kout flèch ki pou fè l' kouri. Wòch fistibal, se boul koton pou li. ²⁹Yon baton fè se yon bwa mayi pou li. Li ri lè yo voye lans sou li. ³⁰Anba vant li graj graj tankou moso kannari kraze. Kote li pase nan labou a, li make l' tankou machin k'ap kraze boul tè nan jaden. ³¹Lè l' plonje, li boulvèse fon lanmè a, se tankou dlo nan chodyè k'ap bouyi sou dife. Li fè l' bouyi tankou dlo nan veso y'ap boule odè. ³²Lè l'ap naje, li kite nan dlo a yon chemen ki klere nan solèy la. Li fè tout lanmè a kimen. ³³Pa gen bèt tankou l' sou latè. Bondye kreye l' pou l' pa janm pè anyen. ³⁴Li gade bèt ki pi fewòs yo nan je. Se li ki wa tout bèt sovaj yo.

Jòb 42

¹Men sa Jòb reponn Seyè a: ²-Mwen konnen, Seyè, ou gen tout pouvwa. W'ap fè tou sa ou mete nan tèt ou pou ou fè. ³Ou mande kisa mwen ye menm pou m'ap poze keksyon sou plan travay ou, ak yon bann diskou ki pa vle di anyen. Mwen te louvri bouch mwen pale sou sa m' pa konprann, sou bèl bagay ki twò fò pou mwen. ⁴Ou te mande m' pou m' koute sa w'ap di m', pou m' pare pou m' reponn ou. ⁵Sa m' te konn sou ou a, se sa lòt moun te di m' ase. Koulye a, mwen wè ou ak je mwen. ⁶Se konsa, mwen wete tou sa mwen te di. Mwen kouche sou sann ak nan pousyè, m'ap mande padon. ⁷Lè Seyè a fin pale konsa ak Jòb, li pale ak Elifaz, moun lavil Teman an. Li di l' konsa: -Mwen te fache sou ou ak sou de zanmi ou yo, paske sa nou di sou mwen an pa vre menm. Nou pa t' pale tankou Jòb, sèvitè m' lan. ⁸Atòkile, men sa pou nou fè: Pran sèt towo bèf ak sèt belye mouton. Al jwenn Jòb ak yo. N'a ofri yo pou nou, n'a boule yo nèt. Jòb li menm va lapriyè pou nou. M'a reponn li. Konsa, m'a fè pa nou. Mwen p'ap pini nou deske nou pa t' pale byen sou mwen, jan Jòb, sèvitè m' lan, te fè l' la. ⁹Elifaz, moun lavil Teman an, Bildad, moun lavil Chwa a, ak Sofa, moun lavil Naama a, al fè tou sa Seyè a te di yo fè a. Seyè a fè tou sa Jòb te mande l' nan lapriyè a. ¹⁰Apre Jòb te fin lapriyè pou twa zanmi l' yo, Seyè a mete l' kanpe ankò. Tout zafè l' vin mache byen ankò. Lèfini, Seyè a ba li de fwa lavalè tou sa li te genyen anvan an. ¹¹Tout frè ak sè l' yo ansanm ak tout ansyen zanmi l' yo vin wè li. Yo fè fèt avè l' lakay li. Yo fè l' konnen jan sa te fè kè yo mal pou li pou tout malè sa yo Seyè a te voye sou li. Yo fè l' pran kouraj. Yo chak yo fè l' kado yon pyès ajan ak yon bag lò. ¹²Apre sa, Seyè a te beni Jòb plis pase jan li te fè l' anvan an. Jòb te vin genyen katòzmil (014.000) mouton, simil (06.000) chamo, demil (02.000) tèt bèf ak mil (01000) manman bourik. ¹³Li fè sèt pitit gason ak twa pitit fi. ¹⁴Li rele pi gran pitit fi a Jemina, dezyèm lan Kesya, twazyèm lan Kerèn apouk. ¹⁵Nan tout peyi a pa t' gen pi bèl fanm pase twa pitit fi Jòb yo. Papa a te ba yo chak yon pòsyon nan byen l' yo ansanm ak frè yo. ¹⁶Apre sa, Jòb viv jouk li rive gen sankarantan sou tèt li. Li wè pitit pitit li yo ak pitit pitit pitit li yo, jouk rive sou kat jenerasyon. ¹⁷Lè li mouri, li te fin vye granmoun, li te viv kont li.