Jòb 25–30

Jòb 25

¹Bildad, moun lavil Chwa a, pran lapawòl, li di konsa: ²-Bondye se chèf. Li fè tout moun respekte l'. Li fè tout moun nan peyi ki nan syèl la viv ak kè poze. ³Ki moun ki ka konte kantite zanj k'ap sèvi l'? Pa gen kote limyè Bondye a pa klere. ⁴Atò, moun ka konprann yo gen rezon devan Bondye? Pitit fanm pouse met atè ka san repwòch devan li? ⁵Nan je Bondye, menm lalin lan pa klere ase. Pa gen yonn nan zetwal yo ki bon nèt pou li. ⁶Ale wè pou moun, yon vètè, yon ti krebete! Kisa yo vo nan je Bondye?

Jòb 26

¹Jòb pran lapawòl ankò, li di l' konsa: ²-Ou gen tan konn konsole moun ki nan lafliksyon! Ou gen tan konn lonje men bay moun ki san fòs! ³Ala bon konsèy ou bay moun ki san konprann lan! Ou gen tan gen anpil konesans nan ou! ⁴Men, pou ki moun tout bèl diskou sa yo? Ki moun ki mete pawòl sa yo nan bouch ou? ⁵Bildad pran lapawòl ankò li di: -Nanm moun mouri k'ap viv nan fon lanmè a ap tranble anba tè a. ⁶Peyi kote mò yo ye a louvri aklè devan je Bondye. Pa gen anyen ki pou anpeche Bondye wè sa k'ap pase ladan l'. ⁷Se li menm ki louvri syèl ki sou bò nò a anlè, san anyen pou soutni l'. Li pandye tè a ankò san anyen pou kenbe l'. ⁸Se li menm ki plen nwaj yo dlo. Se li menm ki pa kite pèz dlo a pete nwaj yo. ⁹Se li menm ki kache lalin plenn lan dèyè yon nwaj. ¹⁰Se li menm ki trase yon wonn sou lanmè a, li separe limyè ak fènwa. ¹¹Lè li bay poto ki soutni syèl la yon prigad, yo sezi, yo pran tranble sitèlman yo pè. ¹²Avèk fòs ponyèt li, li fè lanmè a vin dou devan li. Avèk ladrès li, li kraze Raab, gwo bèt lèd la. ¹³Avèk souf li, li fè syèl la vin klè. Avèk men li, li touye gwo koulèv ki t'ap kouri chape a. ¹⁴Sa se yon ti kal nan tou sa li fè. Se sa ase ki resi rive nan zòrèy nou! Men, ki moun ki ka konnen tou sa Bondye fè?

Jòb 27

¹Jòb pran lapawòl ankò pou l' bay rès repons li a. Li di konsa: ²-Mwen fè sèman, mwen pran Bondye vivan an pou temwen, Bondye ki gen tout pouvwa a, li menm ki refize rann mwen jistis la, li menm ki ban m' degoutans ak lavi a, ³toutotan mwen poko mouri, toutotan Bondye ban m' yon ti souf toujou, ⁴mwen p'ap janm kite ankenn move pawòl soti nan bouch mwen, ni m' p'ap janm bay ankenn manti. ⁵Pa janm konprann m'ap ban nou rezon! M'ap kenbe ak nou mwen inonsan jouk mwen rann dènye souf mwen. ⁶Mwen soti pou m' defann kòz mwen. Mwen p'ap fè bak. Konsyans mwen pa repwoche m' anyen. M' pa gen anyen ki pou fè m' wont. ⁷Se pou tout moun ki pa vle wè m' yo sibi menm sò ak mechan yo. Se pou lènmi m' yo gen menm sò ak moun ki pa mache dwat yo. ⁸Ki espwa ki gen pou mechan an lè Bondye rele l', lè li pral pran nanm li? ⁹Lè malè ap tonbe sou mechan an, èske Bondye ap tande rèl li yo? ¹⁰Li pa t' janm pran plezi l' nan fè volonte Bondye. Li pa t' lapriyè Bondye tout tan. ¹¹Kite m' moutre nou jan Bondye konnen sa l'ap fè. Mwen p'ap kache di nou sa ki nan tèt Bondye ki gen tout pouvwa a. ¹²Sa m'ap di la a? Nou wè tou sa ak je nou byen pwòp tou. Poukisa atò tout pale anpil sa a ki pa vle di anyen? ¹³Lè sa a, Sofa, moun lavil Naama a, pran lapawòl. Epi li di: -Men kisa Bondye pare pou mechan yo. Men sa li sere pou chèf k'ap peze pèp la. ¹⁴Yo te mèt gen anpil pitit gason, yo tout ap mouri nan lagè. Pitit yo p'ap janm gen kont manje pou yo manje. ¹⁵Sa ki chape nan lagè, move maladi ap pote yo ale. Ata vèv yo p'ap ka rele pou yo jou lanmò yo. ¹⁶Mechan an te mèt anpile lajan kou l' pa konnen, li te mèt gen rad depase sa l' bezwen, ¹⁷se moun dwat yo ki va mete rad yo, se pou moun inonsan yo lajan an va rete. ¹⁸Kay li bati tankou twal anasi, tankou yon ti kay jaden. ¹⁹Nan aswè, li moute kabann li rich. Lè li leve, li pa jwenn anyen. ²⁰Malè tonbe sou li tankou lavalas k'ap desann. Yon sèl nwit lan, yon gwo van pote l' ale. ²¹Yon van lès leve, li pote l' ale. Li rache l' nan kay kote l' ye a. ²²Van an ap vante sou li san pitye. Li menm l'ap fè sa li kapab pou l' chape anba l'. ²³Moun kontan wè jan li fini. Kote l' pase, y'ap rele chalbari dèyè l'.

Jòb 28

¹Gen mi n anba tè kote yo jwenn ajan. Gen kote se la yo netwaye lò. ²Yo fouye tè pou jwenn fè. Yo fonn wòch pou jwenn kwiv. ³Yo desann ak limyè anba tè, kote ki fè nwa anpil, yo fouye byen fon nan vant latè, mezi yo kapab. Y' al chache wòch ki kache kote ki fè nwa anpil la. ⁴Byen lwen, kote moun pa ka rete, kote moun pa janm mete pye yo, moun ap fouye gwo koridò anba tè. Y'ap travay pou kont yo, ak yon kòd pase nan ren yo, y'ap balanse nan twou yo. ⁵Manje soti nan tè. Men, nan zantray latè a dife fin debòde. ⁶Wòch latè a gen bèl pyè safi ladan l'. Nan pousyè a yo jwenn ti grenn lò. ⁷Koukou pa janm konnen chemen pou ale la. Karanklou pa janm wè kote sa a ak je l'. ⁸Ni lyon, ni ankenn lòt bèt nan bwa, pa janm mete pye yo la. ⁹Yo fouye nan wòch dife. Yo fè gwo twou byen fon nan pye mòn yo. ¹⁰Yo fè gwo koridò byen long nan wòch yo. Yo jwenn tout kalite bèl pyè bijou ki koute chè. ¹¹Yo fouye nan sous tèt dlo yo tou. Yo mete deyò tou sa ki te kache. ¹²Men, kote nou ka jwenn konesans lan? Kote bon konprann lan ye menm? ¹³Lèzòm pa konnen sa pou yo fè pou yo mete men sou li. Yo pa jwenn li ankenn kote sou latè. ¹⁴Fon lanmè a deklare li pa gen bagay konsa. Lanmè a deklare bon konprann pa lakay li. ¹⁵Ou te mèt gen lò, ou pa ka achte l'. Ou pa ka bay lajan pou ou genyen l'. ¹⁶Li gen plis valè pase lò peyi Ofi a. Bèl pyè oniks ak safi pa ka parèt la. ¹⁷Yo pa ka konpare l' ni ak lò ni ak bèl kristal. Yo pa ka boukante l' pou yon bèl veso fèt an lò. ¹⁸Pou grenn koray ak wòch kristal menm, yo pa ka parèt la. Pito ou al dèyè bon konprann pase ou ale dèyè bèl pyè lanbi. ¹⁹Topaz peyi Letiopi pa vo anyen devan l'. Pi bon lò a pa ka konpare ak bon konprann. ²⁰Men, kote nou ka jwenn konesans lan? Kote bon konprann lan ye menm? ²¹Pa gen moun, pa gen bèt ki ka wè l', pa menm zwazo k'ap vole nan syèl la. ²²Ata lanmò ak simityè di se tande yo tande nonmen non l'. ²³Se Bondye ase ki konn chemen an. Se li ase ki konnen kote li rete. ²⁴Paske Bondye wè dènye bout latè. Li voye je l', li gade tou sa ki anba syèl la. ²⁵Lè Bondye t'ap bay van yo pèz yo, lè li t'ap bay dlo lanmè a mezi kote pou l' rive a, ²⁶lè li t'ap bay lòd kote pou lapli tonbe ak chemen pou loraj yo pran lè y'ap gwonde, ²⁷se lè sa a li te wè bon konprann, li wè sa li vo. Li egzaminen l' byen egzaminen, li sonde l' byen sonde. ²⁸Apre sa, Bondye di moun konsa: -Gen krentif pou Bondye, se sa ki rele bon konprann. Vire do bay sa ki mal, men sa ki rele gen lespri.

Jòb 29

¹Jòb tanmen pale ankò, li di: ²-Ki moun ki va fè m' viv tan lontan an, lè Bondye t'ap voye je sou mwen an? ³Lè sa a, Bondye te toujou la avèk mwen. Limyè li te klere anwo tèt mwen, li t'ap moutre m' kote pou m' mete pye m' nan fènwa a. ⁴Nan tan sa a, tout zafè m' t'ap mache byen. Bondye te zanmi m'. Li t'ap pwoteje kay mwen. ⁵Bondye ki gen tout pouvwa a te toujou la avèk mwen. Mwen t'ap viv nan mitan tout pitit gason m' yo. ⁶Bèf ak kabrit mwen yo te konn bay anpil lèt. Pye oliv mwen yo te donnen menm nan tè wòch. ⁷Lè mwen parèt pòtay lavil la, lè mwen pran plas mwen nan mitan chèf fanmi yo, ⁸wè yo wè m', jenn gason yo mete kò yo sou kote, granmoun yo leve kanpe pa respè pou mwen. ⁹Notab yo sispann pale, yo fèmen bouch yo. ¹⁰Ata chèf yo pa ka pale ankò! Lang yo vin lou nan bouch yo. ¹¹Tout moun ki te wè m' t'ap mache fè lwanj mwen, tout moun ki te tande m' te kontan avè m'. ¹²Mwen lonje men bay pòv malere ki nan ka ansanm ak timoun san papa ki san sekou. ¹³Moun ki te nan pi gwo mizè t'ap fè lwanj mwen. Mwen te fè kè vèv yo kontan. ¹⁴Mwen te toujou fè sa ki dwat. Mwen pa t' janm nan patipri. ¹⁵Se mwen ki te wè pou avèg yo. Se mwen ki te mache pou kokobe yo. ¹⁶Mwen te yon papa pou pòv malere yo. Mwen te kanpe pou defann kòz etranje yo. ¹⁷Mwen te kraze pouvwa malveyan yo. Mwen sove moun ki te anba men yo. ¹⁸Mwen t'ap di nan kè m': M'a viv kont viv mwen. M'a mouri sou kabann mwen ak kè poze. ¹⁹Mwen te tankou yon pyebwa plante bò larivyè. Sou tout branch li yo se lawouze. ²⁰Moun pa ta janm sispann fè lwanj mwen. Mwen t'ap toujou gen tout fòs mwen sou mwen. ²¹Lè m'ap pale, tout moun fèmen bouch yo. Yo louvri zòrèy yo, y'ap tann konsa konsèy m'ap bay. ²²Pawòl mwen tonbe nan kè yo tankou grenn lapli. Lè m' fin pale, pesonn pa gen anyen pou di ankò. ²³Yo t'ap tann mwen pale tankou tè sèk k'ap tann lapli. Yo rete bouch louvri pou ranmase sa m'ap di. ²⁴Lè yo dekouraje, mwen fè yon ti ri ak yo. Sa te kont pou remoute kouraj yo. ²⁵Mwen te kanpe alatèt yo. Mwen mennen yo tankou yon wa k'ap mennen sòlda li yo. Mwen di yo sa pou yo fè. Mwen te ba yo kouraj lè yo nan lafliksyon.

Jòb 30

¹Men koulye a, moun ki pi jenn pase m' yo ap pase m' nan rizib. Papa yo se moun mwen pa t' pran pou anyen, moun mwen pa ta menm mete ak chen m' pou gade mouton. ²Epitou, yo te twò fèb pou fè anyen pou mwen. Se te yon bann gason san kouraj. ³Mizè ak grangou te fini ak yo. Lannwit se grenn bwa yo te konn al souse nan savann kote moun pa rete. ⁴Yo pran fèy raje pou yo manje. Ata rasin bayawonn pase. ⁵Kote yo pase moun mete yo deyò, yo rele bare dèyè yo tankou vòlè. ⁶Yo te blije al rete nan twou wòch, nan twou tè sou bò ravin yo. ⁷Y'ap rele tankou bèt mawon nan raje a. Yo fè pil sou pil nan savann lan. ⁸Se te yon bann sanzave ki pa t' menm gen non. Yo te mete yo deyò nan peyi a. ⁹Koulye a, y'ap fè chante sou mwen. Y'ap bay istwa sou do m'. ¹⁰Yo pè pwoche bò kote m' pou m' pa sal yo. Yo menm krache nan figi m'. ¹¹Paske Bondye kraze kouraj mwen, li lage m' atè, kifè, mapou tonbe, kabrit manje fèy li. ¹²Bann moun sa yo leve dèyè m', y'ap fè m' kouri. Yo lage dèyè m' pou yo pran m'. ¹³Yo sènen m' toupatou pou yo ka fini avè m'. Pa gen pesonn pou di yo pa fè sa. ¹⁴Yo pase nan fant barikad, yo tonbe sou mwen. Yo pilonnen m' anba pye yo. ¹⁵Yon sèl latranblad pran mwen. Tankou yon kout van li kraze kouraj mwen. Tankou yon nwaj k'ap pase, tout byen m' yo disparèt. ¹⁶Koulye a, mwen prèt pou m' mouri. Lafliksyon ap fini avè m'. ¹⁷Lannwit, tout zo nan kò m' ap fè m' mal. Doulè ap manje m' anndan san rete. ¹⁸Bondye ponyen m' nan kòlèt, l'ap chifonnen tout rad sou mwen. ¹⁹Li voye m' jete nan labou. Mwen pa pi bon pase pousyè tè ak sann dife. ²⁰Mwen rele nan pye ou, Bondye! Ou pa reponn mwen. Mwen kanpe devan ou, ou pa okipe m' menm. ²¹Ou pa menm moun lan ankò. W'ap malmennen m'. Ou soti pou pèsekite m' ak tout fòs ou. ²²Ou fè van pote m' ale. M'ap vole tankou pay. Ou voye yon van tanpèt boulvèse m'. ²³Wi, mwen konnen byen pwòp w'ap mennen m' pou m' al mouri, pou m' al sibi sò k'ap tann tout moun lan. ²⁴Poukisa w'ap atake yon moun ki tou fin mouri, yon moun ki pa ka fè anyen ankò pase mande padon? ²⁵Eske mwen pa t' nan lapenn ansanm ak moun ki te nan mizè? Eske kè m' pa t' fè m' mal pou moun ki pa t' gen anyen menm yo? ²⁶Mwen t'ap tann kontantman, se malè ki vini. Mwen t'ap tann limyè, se fènwa ki kouvri m'. ²⁷Tout zantray mwen ap bouyi san rete. Chak jou m'ap soufri pi rèd. ²⁸M'ap mache kagou, san pesonn pou konsole m'. Mwen kanpe nan mitan tout moun, m'ap mande sekou. ²⁹Vwa mwen tankou vwa koukou. Mwen rele tankou frize. ³⁰Po m' vin tou nwa, l'ap dekale. Lafyèb ap manje m' nan zo. ³¹Lontan se mizik gita ak fif ase ki te nan zòrèy mwen. Men, koulye a, se plenn, se kriye ase m'ap tande.