Jòb 9–12

Jòb 9

¹Lè sa a, Jòb pran lapawòl, li di konsa: ²-Wi, mwen konnen se konsa sa ye. Men, ki jan pou yon moun ka gen rezon devan Bondye? ³Si li vle plede ak Bondye, Bondye ap mande l' venmil keksyon, li p'ap ka reponn yonn menm. ⁴Bondye sitèlman gen bon konprann, li sitèlman gen fòs, pa gen moun ki ka kenbe tèt avè l' pou yo pa peye sa. ⁵Li deplase mòn yo lè lide l' di l'. Lè li an kòlè, li voye yo jete byen lwen. ⁶Bondye fè tè a tranble kote l' chita a. Li souke poto ki soutni l' yo. ⁷Li annik bay yon lòd, epi solèy la pa leve. Li fè zetwal yo pa klere lannwit. ⁸Li te pou kont li lè li t'ap louvri syèl la anwo tè a. Li mache sou lanmè a jan li vle. ⁹Se li ki fè zetwal yo: Gwo Kabwèt la, Oryon, Lapousiyè ak zetwal Sid yo. ¹⁰Se li menm ki fè yon bann bèl bagay nou pa ka fin konprann, yon dal mèvèy nou pa ka fin konte. ¹¹Bondye te mèt ap pase toupre m', mwen pa ka wè l'. Li glise kò l', li ale. ¹²Li pran sa l' bezwen. Pa gen moun ki pou enpoze l' fè l'. Pa gen moun ki ka penmèt yo mande l': Sa w'ap fè la a? ¹³Bondye pa ka kenbe kòlè l' ankò! Li fè tout patizan Raab yo bese tèt devan li. ¹⁴Se mwen menm atò ki pou ta kenbe tèt avè l'? Se mwen menm atò ki pou ta plede avè l'? ¹⁵Menm si m' te gen rezon, sa m' bezwen defann tèt mwen fè? Se li k'ap jije m', se padon ase pou m' mande l'. ¹⁶Menm si li ta reponn mwen lè m' rele l', mwen pa kwè li ta koute sa m'ap di l'. ¹⁷Li rete konsa li kraze m' pou anyen. Li blese m' nan tout kò m', san m' pa fè anyen. ¹⁸Li pa ban m' tan pou m' pran yon ti souf menm. Li voye malè sou mwen yonn apre lòt. ¹⁹Mwen ta seye fè fòs avè l'? Fòs, se nan men l' sa ye. Mwen ta rele l' tribinal? Ki jij ki va voye manda ba li? ²⁰M' te mèt gen rezon, pawòl nan bouch mwen ap kondannen m'. M' te mèt inonsan, tou sa m'ap di ap ban m' tò. ²¹Eske m' inonsan? M' pa menm ka di sa. Lavi pa di m' anyen ankò! ²²Si gen yon bagay m' ka di: inonsan ou koupab, se menm bagay. Bondye ap toujou detwi nou. ²³Si yon malè konmanse ap simen lanmò, inonsan te mèt ap rele, Bondye ri sa. ²⁴Lè yon peyi tonbe anba men moun ki mechan, Bondye bouche je tout jij yo. Si se pa li ki fè sa, ki moun ki pou fè l'? ²⁵Jou yo pase pou mwen pi vit pase dlo larivyè. Pa gen yonn ki ban m' kè kontan. ²⁶Yo kouri tankou bwa fouye sou larivyè, tankou malfini k'ap plonje sou ti poul. ²⁷Si mwen di: Bon. M' p'ap plenyen ankò. M'ap chanje figi m', m'ap fè yon ti ri, ²⁸soufrans yo vin pi rèd sou mwen. Mwen pè, paske mwen konnen pou Bondye mwen pa inonsan. ²⁹Si m' antò, sa m' bezwen bat kò m' pou gremesi fè? ³⁰Pa gen dlo ki ka lave m'. Pa gen savon ki ka blanchi m'. ³¹Bondye voye m' jete nan yon pil fatra. Ata rad m' pa ka mete sou mwen. ³²Men, Bondye pa yon moun tankou m'. M' pa ka diskite avè l'. Nou pa ka al lajistis. ³³Pa gen moun ki ka mete ola nan koze a. Pa gen moun ki ka jije m' ansanm avè l'. ³⁴Pa gen moun ki ka kenbe men l' pou li sispann fè m' pè. ³⁵Men, mwen pa pè l'. M'ap pale, paske se mwen ki konnen sa ki nan kè m'.

Jòb 10

¹M' degoute ak lavi a. M' pa ka kenbe ankò. Kite m' plenn sò mwen! Kite m' di tout lapenn ki nan kè mwen! ²M'a di Bondye: Tanpri, pa kondannen m'. Fè m' konnen poukisa ou leve dèyè m' konsa. ³Eske ou gen rezon pou ou fè m' tou sa w'ap fè m' lan, pou ou meprize sa ou fè ak men ou, pou ou ri lè mechan yo ap fè konfyolo yo? ⁴Eske ou wè sa k'ap fèt sou latè tankou nou menm moun nou wè l' la? ⁵Lavi ou pa tankou lavi pa nou. Nou gen pou nou mouri, ou menm w'ap toujou la. ⁶W'ap chache dènye ti peche moun fè. Ou dèyè pou ou konnen tou sa mwen fè ki mal. ⁷Ou konnen m' pa antò. Pa gen moun ki ka sove m' anba men ou! ⁸Se ak men ou ou te fè m'. Se avè l' ou te ban m' fòm mwen. Epi se ak menm men sa yo ou vle detwi m' ankò? ⁹Chonje se ou menm ki fè m' ak labou tè wouj. Koulye a, ou pral kraze m' fè m' tounen pousyè? ¹⁰Se ou menm ki bay papa m' fòs pou li fè m'. Ou fè m' devlope nan vant manman mwen. ¹¹Ou fè tout zo ak tout venn nan kò m'. Ou kouvri yo ak vyann epi ak po. ¹²Lèfini, ou fè m' kado lavi. Ou veye avèk prekosyon pou m' pa mouri. ¹³Men, ou te gen yon lòt lide dèyè tèt ou. Koulye a, mwen konnen ou te pare yon lòt bagay pou mwen. ¹⁴Ou t'ap veye m' pou wè si m' t'ap fè sa m' pa t' dwe fè. Ou pa t'ap kite anyen pase pou mwen. ¹⁵Si m' antò, zafè m' pa bon! Mwen te mèt inonsan, m' pa ka leve tèt devan ou. Mwen wont, se yon pòv malere mwen ye devan ou. ¹⁶Si m' leve tèt mwen, ou fann dèyè m' tankou yon lyon dèyè bèt pou l' manje. Ou rive fè mirak pou ou ka fè m' lapenn. ¹⁷Ou toujou pare pou fè yon atak sou mwen. Chak jou w'ap vin pi ankòlè. Se san pran souf w'ap voye lafliksyon sou mwen yonn apre lòt. ¹⁸Bondye, poukisa ou te kite m' soti nan vant manman m'? Mwen ta mouri anvan pesonn ta wè m'. ¹⁹Soti nan vant, ale nan simityè, se tankou si m' pa t' janm fèt. ²⁰Mwen pa rete lontan pou m' viv ankò. Kite m' pou kont mwen! Ban m' yon ti kanpo. Kite m' jwi de twa jou ki rete m' yo non! ²¹Talè konsa mwen prale pou m' pa janm tounen. Mwen prale nan peyi kote ki fè nwa a, kote moun pè a, ²²nan peyi kote se fènwa ak dezòd ase ki gen toutan, kote menm gwo lajounen fè nwa tankou lannwit!

Jòb 11

¹Lè sa a, Sofa, moun Naama a, pran lapawòl, li di konsa: ²-Atò pesonn p'ap reponn gwo paladò sa a? Pale anpil pa ka bay moun rezon. ³Pa konprann pale anpil ou a ka enpoze moun louvri bouch yo reponn ou. Paske w'ap pase moun nan betiz la, atò yo pa ka fè ou wont? ⁴Ou pretann sa ou di a se verite. Pou ou, ou san repwòch devan Bondye! ⁵Pa pito Bondye ta pale pou l' reponn ou! ⁶Li ta fè ou wè gen anpil lòt bagay ou poko konnen, bagay moun pa ka konprann. Lè sa a, ou ta wè Bondye pa fè ou peye pou tou sa ou fè. ⁷Ou konprann ou ka konnen sa ki nan kè Bondye, ou ka konnen tout bagay nèt sou Bondye ki gen tout pouvwa a? ⁸Li pi wo pase syèl la. Sa ou ka fè pou sa? Li pi fon pase peyi kote mò yo ye a. Sa ou ka konnen la? ⁹Li pi long pase longè tout tè a. Li pi laj pase lanmè a. ¹⁰Si Bondye arete ou, li mete ou nan prizon, li trennen ou nan tribinal, ki moun ki ka di l' non? ¹¹Bondye konnen tout moun k'ap bay manti. Je l' byen louvri, li wè tout mechanste moun ap fè. ¹²Konsa, moun fou va konmanse gen konprann. Bourik sovaj yo va donte. ¹³Annou wè, monchè! Pran tèt ou! Louvri bra ou devan Bondye. ¹⁴Sispann fè vye bagay k'ap sal men ou yo. Pa kite mechanste chita lakay ou. ¹⁵Lè sa a, w'a leve tèt ou pou gade moun nan je. W'a byen fèm, ou p'ap pè anyen. ¹⁶W'a bliye lapenn ou yo. Tankou yon inondasyon ki fin pase, ou p'ap chonje yo ankò. ¹⁷Lavi ou pral klere pi bèl pase gwo solèy midi. Move pa yo pral tankou yon douvan jou. ¹⁸Ou pral viv san kè sote. Ou p'ap dekouraje. Bondye va pwoteje ou, l'a ba ou kè poze. ¹⁹Lè w'ap dòmi, pesonn p'ap deranje ou. Anpil moun va vin achte figi ou. ²⁰Men, mechan yo ap voye je yo bouske toupatou, yo p'ap jwenn kote pou yo chape kò yo. Sèl espwa yo, se lanmò y'ap tann.

Jòb 12

¹Jòb pran lapawòl, li di: ²-Apa nou k'ap pale pou pèp la! Mouri nou mouri, bon konprann kaba! ³Men, mwen menm tou, mwen gen lespri menm jan avè nou. Mwen pa pi mal pase nou. Sa nou sot di la a, tout moun konnen l'. ⁴Koulye a, menm zanmi m' ap pase m' nan rizib. Y'ap ri m', mwen menm yon moun Bondye pa gen anyen pou l' repwoche, yon moun Bondye te konn reponn lè m' rele l'. ⁵Se konsa, moun ki pa nan pwoblèm meprize moun ki nan lafliksyon. Yo wè yon moun k'ap tonbe, yo ba l' bourad fè l' tonbe pi vit. ⁶Piyajè yo byen trankil lakay yo. Moun k'ap fè Bondye fache yo ap viv alèz. Bondye yo se fòs ponyèt yo. ⁷Manyè fè ti koze ak zannimo yo, ak zwezo yo. Yo gen anpil bagay pou yo moutre nou. ⁸Bèt k'ap trennen sou vant va ban nou leson, pwason nan lanmè va di nou sa yo konnen. ⁹Pa gen yonn ladan yo ki pa konnen se Bondye ki fè tout bagay ak men li. ¹⁰Bondye gen nanm tout sa ki vivan nan men li. Wi, lavi tout moun nan men li. ¹¹Bèl pawòl fè plezi zòrèy menm jan bon manje gou nan bouch. ¹²Yo di se vye granmoun ki gen konesans, se laj ki bay bon konprann. ¹³Men, Bondye gen konesans, lèfini li gen pouvwa. Li gen bon konprann, lèfini li fè sa li vle. ¹⁴Lè Bondye kraze yon bagay, pesonn pa ka refè l'. Lè li mete yon moun nan prizon, pesonn pa ka lage l'. ¹⁵Lè li pa bay lapli, sèk tonbe sou latè. Lè li bay lapli, dlo fè dega toupatou. ¹⁶Bondye gen fòs, li konn sa l'ap fè. Ni moun k'ap bay manti, ni moun k'ap pran manti, se anba ponyèt li yo ye. ¹⁷Li fè moun k'ap bay konsèy yo pèdi tèt yo. Li fè chèf yo aji tankou moun fou. ¹⁸Li wete tout pouvwa nan men wa yo. Li mare yon tanga nan ren yo jete yo nan prizon. ¹⁹Li fè prèt yo mache pye atè. Li mete gwo zotobre atè! ²⁰Li fèmen bouch moun k'ap bay bon konsèy. Li fè granmoun yo depale. ²¹Li fè pase grannèg yo nan betiz. Li wete pouvwa gwo chèf yo nan men yo. ²²Li klere twou fon kote ki fè nwa a, li mete twou lanmò a aklè. ²³Li fè nasyon yo fè pwogrè, lèfini, li fè yo deperi. Li fè yon pèp pran elan, lèfini, li fè l' disparèt. ²⁴Li fè chèf pèp yo pèdi tèt yo, li fè yo moute desann nan dezè, san yo pa konn kote yo prale. ²⁵Y'ap tatonnen nan fènwa, y'ap titibe tankou moun sou.