Jòb 13–16

Jòb 13

¹Wi, mwen wè tou sa ak de je m'. Mwen tande tou sa ak de zòrèy mwen epi mwen konprann. ²Sa nou konnen an, mwen konnen l' tou. M' pa pi sòt pase nou. ³Men, mwen menm, se ak Bondye ki gen tout pouvwa m' annafè. Se avè l' mwen vle pale pou m' defann kòz mwen. ⁴Nou menm, kote nou pa konnen nou bay manti. Nou tankou dòktè ki pa janm geri pyès moun. ⁵Pito nou pe bouch nou! Lè sa a, n'a pase pou moun ki gen bon konprann. ⁶Koute sa mwen gen sou kè m'. Louvri zòrèy nou pou n' tande jan m' pral plede kòz mwen. ⁷Se defann nou vle defann Bondye kifè n'ap bay tout manti sa yo, kifè n'ap pale kwochi konsa? ⁸Se pou li n'ap pran? Se kòz li nou ranmase? ⁹Pou li, li ta bon pou nou si li t'ap chache konnen sa nou gen nan fon kè nou! Pa konprann nou ka woule Bondye tankou nou woule moun! ¹⁰Li ta regle nou byen regle, paske li ta tou wè se figi l' n'ap achte anba chal. ¹¹Nou pa pè gwo pouvwa Bondye a? Nou pa pè li kraze nou? ¹²Bèl pawòl nou yo pa gen plis valè pase pousyè tè. Repons n'ap ban mwen yo pa kenbe, yo tankou miray sab. ¹³Koulye a, pe bouch nou! Ban m' yon chans pou m' pale. Sa ki pou rive a te mèt rive! ¹⁴Mwen mèt mouri! Zafè! M' mare ren m', m' sere dan m'! ¹⁵Bondye te mèt touye m'. Sèl chans mwen se pou m' esplike avè l'. ¹⁶Nou pa janm konnen, se sa ki ka sove m', paske moun ki fè mal pa ka parèt devan Bondye. ¹⁷Koute byen sa m' pral di la a. Louvri zòrèy nou pou n' tande deklarasyon mwen. ¹⁸M' pare pou m' defann kòz mwen, paske mwen konnen mwen nan dwa m'. ¹⁹Bondye, èske se ou ki pral plede avè m'? M' tou pare pou m' pe bouch mwen, pou m' asepte lanmò m'. ²⁰De sèl ti chans ase m'ap mande ou. Apre sa, m' p'ap kache pou ou ankò. ²¹Sispann leve men ou sou mwen. Sispann fè m' pè tout pè sa a. ²²Ou mèt pale anvan, m'a reponn ou. Osinon, kite m' pale anvan, w'a reponn mwen. ²³Konbe peche, konbe bagay mal mwen fè? Kisa m' fè mwen pa t' dwe fè? Kisa m' fè ki mal? ²⁴Poukisa w'ap kache pou mwen konsa? Poukisa ou fè tankou si se lènmi ou mwen ye? ²⁵Poukisa w'ap chache fè m' pè? Poukisa ou leve dèyè m' konsa? M' tou fini, m' tankou fèy bwa, tankou pay chèch van ap pote ale. ²⁶W'ap akize m' yon bann bagay k'ap fè m' mal. W'ap fè m' peye tou sa m' te fè lè m' te jenn gason. ²⁷Ou mete pye m' nan sèp. Ou veye tout vire tounen m'. Ou gade tout kote m'ap mete pye m'. ²⁸M'ap dekale tankou bwa pouri, tankou rad sizo ap manje.

Jòb 14

¹Nou menm moun, se nan vant fanm nou soti. Lavi nou kout, men li pa manke traka! ²Nou parèt tankou yon flè. Epi lamenm nou fennen. Nou disparèt tankou yon nwaj k'ap pase. ³Epi, Bondye, se sa w'ap louvri je ou gade. Se sa w'ap fè kanpe devan ou pou jije l'? ⁴Ki moun ki ka fè dlo pwòp soti nan yon sous sal? Pesonn moun. ⁵Tan chak moun gen pou l' viv la fikse deja depi lontan. Kantite mwa li gen pou l' viv la, se nan men ou sa rete. Anyen pa ka chanje. ⁶Tanpri, wete je ou sou mwen. Kite m' pran yon ti souf. Tankou moun ki fin pase yon jounen ap travay di, kite m' pran yon ti kanpo. ⁷Toujou gen yon ti espwa pou yon pyebwa. Yo te mèt koupe l', l'ap toujou pouse ankò, li p'ap mouri. ⁸Rasin li yo te mèt fin vye nan tè a, bout chouk la te mèt fin chèch, ⁹depi li jwenn dlo, l'ap boujonnen, l'ap pouse kreyòl. ¹⁰Men moun, depi yo mouri, yo tounen kadav. Lè yo kase kòd, ou pa wè kote yo fè. ¹¹Letan ka cheche, larivyè ka sispann koule. ¹²Men, kote yon moun mouri kouche a, pa gen leve pou li ankò. Poul va fè dan anvan y'a leve vivan ankò, anvan y'a leve soti nan dòmi yo a. ¹³Si sèlman ou ta vle kache m' nan peyi kote mò yo ye a? Si ou te ka kite m' la jouk kòlè ou la fin pase? Apre sa, ou ta fikse yon dat pou chonje m' ankò. ¹⁴Men, sa m'ap di la a? Eske moun mouri ka leve? Sa pa fè anyen. Mwen ta tann move tan sa a fin pase, jouk sa ta bon pou mwen ankò. ¹⁵Lè sa a, ou ta rele m', mwen ta reponn ou. Ou ta kontan wè sa ou te fè ak men ou lan. ¹⁶Lè sa a, ou ta gade jan m'ap mache a, men, ou pa ta chonje sa m' te konn fè ki mal. ¹⁷Ou ta padonnen m' peche m' yo, ou ta mare yo tout fè yon pakèt voye jete. ¹⁸Rive yon lè se pou mòn yo anfale, se pou wòch yo woule desann. ¹⁹Rive yon lè dlo ap fin manje wòch yo, lapli ap fin bwote tout tè a desann. Konsa tou, rive yon lè ou wete tout espwa nan kè moun. ²⁰Ou kraze yo nèt anba men ou, epi yo mouri. Ou fè moun pa ka rekonèt yo, epi ou voye yo ale. ²¹Moun fè lwanj pitit mò yo, men mò yo menm yo pa konn anyen. Moun pase yo nan betiz, men yo menm, sa pa di yo anyen. ²²Yon sèl soufrans yo santi se sa k'ap manje yo nan tout kò yo a. Se pou tèt pa yo ase y'ap plenyen!

Jòb 15

¹Fwa sa a, Elifaz, moun lavil Teman an, pran lapawòl ankò, li di konsa: ²-Lè yon moun gen bon konprann, se pa avèk pawòl anlè pou li reponn. Li p'ap chita ap fè jazè. ³Li p'ap rete ap defann tèt li ak mo ki pa vle di anyen, ak bèl diskou ki pa sèvi anyen. ⁴Ou menm menm, ou al pi lwen. Dapre sa ou di la a, moun pa bezwen gen krentif pou Bondye ankò. Pa gen nesesite pou moun lapriyè Bondye. ⁵Jan ou pale a, yo wè ou se yon moun ki mechan nan fon kè ou. Ou pale tankou moun k'ap kache yon bagay. ⁶Se bouch ou menm k'ap kondannen ou. Se pa mwen. Se pawòl nan bouch ou menm k'ap fini avè ou. ⁷Manyè di m' non: Eske se ou menm premye moun Bondye te fè? Eske ou te fèt anvan tout mòn yo? ⁸Eske ou te la lè Bondye t'ap fè plan travay li, kifè ou konnen pase tout moun? ⁹Kisa ou konnen nou menm nou pa konnen? Kisa ou konprann nou menm nou pa ka konprann? ¹⁰Se nan bouch granmoun lontan, granmoun cheve blan ki pi gran pase papa ou nou pran tout konesans pa nou. ¹¹Poukisa ou pa asepte ankourajman Bondye voye ba ou a? Poukisa ou pa koute nou? N'ap pale byen dousman avè ou la a. ¹²Men, gade jan ou move! W'ap louvri je ou sou nou! ¹³W'ap pase kòlè ou sou Bondye. W'ap plede joure l'. ¹⁴Ki jan ou ta vle pou moun san repwòch devan Bondye? Pou moun ki soti nan vant fanm gen rezon devan Bondye? ¹⁵Ata zanj li yo, Bondye pa fè yo konfyans. Yo menm tou yo pa fin bon nèt nan je l'. ¹⁶Ale wè atò pou moun, ki pèvèti, ki pa vo anyen, ki fè mechanste tankou yo bwè dlo! ¹⁷Koulye a, Jòb, koute m'. Kite m' esplike avè ou! Mwen pral di ou sa mwen menm mwen wè. ¹⁸Moun ki gen bon konprann moutre m' anpil verite. Yo pa t' kache m' anyen. Yo menm, se nan bouch granmoun lontan yo te pran l'. ¹⁹Granmoun sa yo t'ap viv nan peyi Bondye te ba yo pou yo menm ase, san ankenn moun lòt nasyon pa t' mele ak yo. ²⁰Mechan yo pase tout lavi yo nan tèt chaje. Moun k'ap plede maltrete parèy yo p'ap viv lontan. ²¹Rèl moun k'ap soufri yo ap kònen nan zòrèy yo. Lè zafè yo pi bon, se lè sa a vòlè tonbe sou yo. ²²Yo pa gen espwa chape nan fènwa a, paske manchèt pare ap tann yo. ²³Y'ap kouri adwat agoch, y'ap chache manje. Yo konnen wè pa wè y'ap pran yo. ²⁴Lanmò fè yo pè. Malè ak lafliksyon ap tonbe sou yo tankou yon wa ki tou pare pou batay. ²⁵Men sa k'ap tann moun k'ap lonje men nan figi Bondye, moun ki pa pè kenbe tèt ak Bondye. ²⁶Yo kache dèyè pwotèj anfe yo epi yo fonse sou Bondye. ²⁷Figi yo gra kou chat. Men gwosè vant yo ak grès! ²⁸Yo rete nan lavil ki fin kraze, nan kay moun kouri kite, kay ki fin tounen mazi. ²⁹Yo p'ap janm rich toutan. Sa yo genyen an la pou yon tan. Menm lonbray yo ap disparèt. ³⁰Yo p'ap ka kouri pou fènwa a. Y'ap tankou yon pyebwa dife boule tout branch li yo epi van bwote tout flè l' yo ale. ³¹Yo pa bezwen konte sou pozisyon yo. Nou konnen sa p'ap sèvi yo anyen. ³²Anvan yo donnen, branch yo ap fennen. boujon yo p'ap pouse fèy ankò. ³³Y'ap tankou yon pye rezen ki pèdi tout grap rezen vèt yo, tankou yon pye oliv ki pèdi tout flè l'. ³⁴Wi, mechan yo p'ap gen pitit. Dife ap boule tout kay yo bati ak lajan yo volè. ³⁵Lè yon moun ap chache fè moun mal, se sou li malè a tonbe. Se pwòp tèt li l'ap twonpe.

Jòb 16

¹Jòb pran lapawòl ankò, li di konsa: ²-Mwen bouke tande pawòl sa yo! Pase nou konsole moun, se plis lapenn n'ap ba yo. ³Kilè n'a sispann tout pale anpil sa a? Sa k'ap pouse nou konsa? Nou toujou pare pou reponn moun! ⁴Si m' te nan plas nou, epi nou menm nan plas mwen, m' ta ka pale jan nou pale a tou, m' ta pase nou nan yon wonn tenten, m' ta vide bèl diskou sou nou. ⁵M' ta remoute kouraj nou ak konsèy, m' ta pale ak nou jouk nou ta soulaje. ⁶Men, lè mwen pale, doulè a la pi rèd pou mwen. Lè mwen pa pale, se pa sa k'ap fè l' ban m' yon ti louga. ⁷Koulye a, Bondye, se fini ou fini avè m'. Ou kite yo touye tout fanmi m'. ⁸Ou mete men sou mwen, ou pa vle wè m' ankò. Mwen tounen zo ak po. Yo di se paske mwen antò ki fè sa rive m'. ⁹Nan kòlè li, Bondye ap dechire m' moso pa moso. L'ap devore m' anba dan l'. L'ap louvri je l' sou mwen, li pa vle wè m'! ¹⁰Moun prèt pou manje m'. Yo kouri sou mwen, y'ap joure m', y'ap touye m' anba souflèt. ¹¹Bondye lage m' nan men mechan yo. Li jete m' anba grif san manman yo. ¹²Mwen t'ap viv tou dousman, li bouskile m'. Li pran m' dèyè nwa kou, li kraze m', li fè m' tounen jwèt li. ¹³L'ap voye flèch li sou mwen kote m' vire. Li pèse tout kò m', li san pitye pou mwen, li mete san m' deyò. ¹⁴Kote m' vire li blese m', li vare sou mwen tankou yon sòlda nan lagè. ¹⁵Mwen fè rad sak mete sou mwen, mwen woule kò m' nan pousyè tèlman mwen te nan lapenn. ¹⁶Je m' vin wouj afòs mwen kriye. Tout anba je m' gonfle vin tou nwa. ¹⁷Men, mwen konnen mwen pa fè ankenn moun mechanste. Mwen lapriyè Bondye ak tout kè m'. ¹⁸Ou menm latè, pa kache mizè mwen. Pa kite yo fèmen bouch mwen lè m'ap rele nan pye Bondye! ¹⁹Paske mwen konnen gen yon moun nan syèl la k'ap kanpe pou mwen, gen yon moun anwo a k'ap pran defans mwen. ²⁰Zanmi m' yo ap pase m' nan betiz, men, m'ap kriye nan pye Bondye. ²¹Mwen bezwen moun pou plede kòz mwen ak Bondye a, menm jan yon moun plede kòz zanmi l'. ²²M' pa lontan mouri. Mwen pral pran chemen kote moun pa janm tounen an.