Plenn 3–5

Plenn 3

¹Mwen se yon nonm ki konnen mizè moun gen pou pase lè Bondye ankòlè sou yo, lè Bondye ap pini yo. ²Li trennen m', li fè m' mache nan fènwa san yon ti limyè pou klere m'. ³Tout lajounen, l'ap plede bat mwen san rete. ⁴Po kò m' fin chire, vyann mwen parèt deyò konsa. Li kraze tout zo nan kò m'. ⁵Li fèmen m' nan yon koridò mizè ak lafliksyon. ⁶Li fè m' rete kote ki fènwa a tankou moun mouri yo. ⁷Li moute yon miray, li fèmen kote m' ye a, m' pa ka chape. Li mare m' ak gwo chenn. ⁸Tout rele mwen rele byen fò, pesonn p'ap tande m'. ⁹Li simen gwo wòch toupatou sou wout mwen. Kote m' vire, chak pa mwen fè, m' bite. ¹⁰Tankou yon lous, li biske kò l', l'ap veye m'. Tankou yon lyon, li kache, l'ap tann mwen. ¹¹Li fè m' tonbe nan bwa. Li filange tout kò m'. Lèfini, li lage m'. ¹²Li mete flèch nan banza li, li vize. Se sou mwen l'ap voye yo. ¹³Li fè flèch li yo antre fon nan kò m'. ¹⁴Tout moun nan peyi a ap pase m' nan betiz. Se toutan y'ap fè chante sou mwen. ¹⁵Li plen vant mwen ak manje anmè kou fyèl. Li fè m' bwè labsent jouk mwen sou. ¹⁶Li fwote tout figi m' atè, li fè m' kase dan m' nan wòch. ¹⁷Mwen pa konnen sa yo rele kè poze. Mwen bliye sa yo rele kè kontan. ¹⁸Mwen di: M' pa gen lontan pou m' viv ankò. M' pèdi tout espwa mwen te gen nan Bondye. ¹⁹Lè m' chonje nan ki mizè mwen ye, jan m'ap mache pwonmennen san rete, se tankou yon labsent, yon fyèl m'ap vale. ²⁰Wi, lè m' chonje sa, kè m' sere, m' santi kè m' ap rache ²¹Men, mwen reprann kouraj lè m' chonje yon sèl bagay. ²²Seyè a pa janm sispann renmen nou. L'ap toujou gen pitye pou nou. ²³Tankou solèy la ki leve chak maten konsa tou l'ap toujou kenbe pawòl li. ²⁴Mwen di: Se Seyè a ki tout mwen. Se nan li mwen mete tout espwa m'. ²⁵Seyè a bon pou tout moun ki mete konfyans yo nan li, pou moun k'ap konte sou li. ²⁶Sa bon pou nou rete dousman ap tann li vin delivre nou. ²⁷Sa bon pou nou aprann sipòte depi nou tou jenn. ²⁸Lè Bondye ap manyen ak nou, ann chita pou kont nou san di anyen. ²⁹Nou pa bezwen plenyen. Nou pa janm konnen, ka gen espwa toujou. ³⁰Se pou n' pare figi n' pou n' pran souflèt. Se pou n' asepte tou sa yo fè nou. ³¹Bondye sèl Mèt la p'ap janm lage nou nèt. ³²Li ka fè nou lapenn, men l'ap gen pitye pou nou paske li renmen nou anpil. ³³Li pa pran plezi nan fè nou soufri, ni nan ban nou lapenn. ³⁴Atò, se konnen Seyè a, Bondye sèl Mèt la, pa konnen lè y'ap kraze prizonye anba baton, ³⁵lè yo derefize rekonèt dwa Bondye ban nou, ³⁶lè y'ap bay move jijman nan tribinal! Atò, se konnen li pa konnen! ³⁷Depi Bondye Sèl Mèt la pale, se fini! Sa l' di se sak fèt. ³⁸Tou sa ki rive an byen osinon an mal, se li menm ki penmèt sa. ³⁹Lè nou anba bwa pou peche nou yo sa nou bezwen plenyen fè! ⁴⁰Annou gade jan n'ap mennen bak nou! Ann egzaminen byen jan n'ap viv la! Lèfini, ann tounen vin jwenn Bondye! ⁴¹Ann leve bra nou nan syèl la, ann lapriyè nan pye l'! ⁴²Nou peche, nou kenbe tèt avè ou! Men, ou menm ou pa padonnen nou. ⁴³Ou move pi rèd, ou fann nan kò nou! Ou te san pitye. Ou touye nou. ⁴⁴Ou vlope kò ou nan yon gwo nwaj nwa pou lapriyè nou pa rive nan zòrèy ou. ⁴⁵Ou fè nou tounen yon depotwa, yon pil fatra nan mitan lòt nasyon sou latè yo. ⁴⁶Tout lènmi nou yo ap lave bouch yo sou nou. ⁴⁷N'ap viv ak kè sote, si se pa lanmò, se gwo danje, se gwo malè! ⁴⁸De je m' yo ap ponpe dlo tankou larivyè, lè m' wè malè ki tonbe sou pèp mwen an! ⁴⁹Dlo ap koule nan je m' san rete. Li p'ap janm sispann, ⁵⁰jouk jou Seyè a va rete nan syèl la, l'a voye je l' gade, l'a wè! ⁵¹Wi, kè m' fè m' mal pou m' wè sa ki rive moun lavil mwen yo! ⁵²Yon bann moun ki pa vle wè m' san m' pa fè yo anyen pran kouri dèyè m' tankou yon zwazo y'ap chache pran. ⁵³Yo lage m' tou vivan nan yon twou. Yo fèmen bouch twou a ak wòch. ⁵⁴Dlo te prèt pou kouvri tèt mwen. Mwen di: Fwa sa a m' pran! ⁵⁵Nan twou kote m' te ye a, Seyè, mwen rele ou! ⁵⁶Ou tande vwa m'. Tanpri, pa bouche zòrèy ou lè m'ap lapriyè nan pye ou. ⁵⁷Wi, lè m' rele ou, ou pwoche. Ou di m' mwen pa bezwen pè! ⁵⁸Bondye Sèl Mèt, ou pran ka m' an konsiderasyon. Ou sove lavi m'. ⁵⁹Seyè, ou wè tout lenjistis y'ap fè m'. Tanpri, defann kòz mwen. ⁶⁰Ou wè jan yo soti pou pwofite sou mwen, jan y'ap fè konplo pou touye m'. ⁶¹Seyè, ou tande jan y'ap joure m'. Ou konnen konplo y'ap fè sou do m'. ⁶²Tout lajounen, y'ap pale sou mwen, y'ap fè plan. ⁶³Gade yo non! Depi maten jouk aswè yo chita ap fè chante sou do m'! ⁶⁴Seyè, se pou ou pini yo pou tou sa yo fè. ⁶⁵Madichonnen yo! Fè yo pèdi tèt yo! ⁶⁶Move sou yo, Seyè! Pati dèyè yo! Disparèt yo sou latè!

Plenn 4

¹Gade jan bon lò pa klere ankò! Li chanje, li pèdi kalite li! Gade jan wòch Tanp yo gaye nan tout lari! ²Nan tan lontan nou pa ta bay moun peyi Siyon yo pou pi bon lò ki genyen. Gade! Koulye a, yo pa vo pase krich tè moun fè ak men. ³Ata manman chat mawon bay pitit yo tete. Men, pèp mwen an mechan tankou otrich k'ap viv nan dezè. Yo pa pran swen pitit yo. ⁴Lang ti bebe yo kole nan fon bouch yo sitèlman yo swaf dlo. Timoun yo ap rele mande manje. Pa gen pesonn pou ba yo anyen! ⁵Moun ki te konn manje bon manje gou ap tonbe faya nan lari. Moun ki te elve nan gran kay ap chache manje nan fatra. ⁶Peche lavil Jerizalèm pi gwo pase peche lavil Sodòm, ki te rete konsa Bondye disparèt li. ⁷Nazirit nou yo te san repwòch. Pi bon pase yo pa t' genyen. Yo te anfòm, yo te gwonèg. Yon bèl san wouj t'ap koule nan venn yo! ⁸Koulye a, se lonbraj yo ase ki la. Yo fini. Pesonn pa rekonèt yo nan lari. Po yo chèch tankou kòs bwa, yo tounen zo ak po. ⁹Moun ki mouri nan lagè pi bon pase moun ki mouri grangou. Y'ap depafini jouk yo mouri. Yo pa jwenn anyen pou yo manje. ¹⁰Manman ki te renmen pitit yo anpil, koulye a, yo kwit yo pou yo manje. Lè malè a tonbe sou pèp mwen an, se sa yo fè pou yo pa mouri grangou. ¹¹Seyè a fache nèt. Li limen yon sèl kalite dife nan lavil Siyon. Li boule l' ratè. ¹²Pesonn sou latè, pa menm wa peyi sou latè yo, pa t' vle kwè yon jou, moun ki pa vle wè pèp Bondye a ta antre nan pòtay lavil Jerizalèm! ¹³Men, tou sa rive paske pwofèt li yo ak prèt li yo te peche. Yo te lakòz anpil moun ki mache dwat pèdi lavi yo mal. ¹⁴Y'ap mache nan lari tankou moun avèg. Yo bade ak san. Pesonn pa gen dwa manyen rad yo. ¹⁵Kote yo pase moun ap rele: Wete kò nou la! Nou pa pwòp! Pa pwoche! Pa manyen m'! Se konsa y'ap plede kouri sot nan yon peyi al nan yon lòt. Pesonn pa vle resevwa yo. ¹⁶Seyè a pa vle wè yo ankò, se li menm ki gaye yo konsa. Li pa gen konsiderasyon ni pou pè yo ni pou chèf yo. ¹⁷Je nou wouj afòs nou kriye. N'ap tann yon sekou ki pa janm vini. M'ap veye tann yon nasyon ki pa ka fè anyen pou delivre nou. ¹⁸Lènmi ap veye kote nou prale. Nou pa menm gen dwa soti nan lari. Jou lanmò nou rive. Sa ki rete pou nou mouri a pa anyen. ¹⁹Moun ki t'ap kouri dèyè nou yo te pi rapid pase malfini k'ap plonje dèyè poul. Y'ap kouri dèyè nou nan tout mòn yo. Yo tann pèlen pou nou nan tout dezè a. ²⁰Moun Seyè a te chwazi a, li menm ki tout souf lavi nou, li menm nou te konprann ki ta ka toujou pwoteje nou pou lòt nasyon pa anvayi nou, yo pran l', yo mete l' nan prizon! ²¹Nou menm, moun peyi Edon ki rete lavil Ouz, nou mèt fè kè nou kontan, nou mèt fè fèt! Tou pa nou dèyè, tande! Jou sa a, nou pral titibe toutouni nan tout lari. ²²Nou menm, moun lavil Siyon, nou fin peye pou peche nou yo. Bondye ap sispann pini nou! Men, nou menm moun Edon, Seyè a pral pini nou pou peche nou yo. L'ap denonse tou sa nou fè ki mal.

Plenn 5

¹Seyè, gade sa ki te rive nou non! Voye je gade nou. Wè nan ki mizè nou ye! ²Peyi nou an nan men moun lòt nasyon! Yo pran kay nou pou yo. ³Nou se timoun san papa. Manman nou tankou fanm ki pèdi mari yo. ⁴Se achte pou n' achte dlo pou nou bwè. Si nou pa gen lajan, nou pa jwenn bwa pou nou boule. ⁵N'ap travay di tankou bourik, tankou bèf kabwa. Nou bouke, nou pa ka pran kanpo. ⁶Pou nou ka jwenn manje pou nou manje nou blije ap lonje men bay peyi Lejip ak peyi Lasiri. ⁷Zansèt nou yo fè peche. Yo pa la ankò! Se nou menm k'ap peye pou sa yo te fè. ⁸Moun k'ap gouvènen nou yo se esklav yo ye. Pesonn pa ka delivre nou anba men yo. ⁹Se gwo danje lè nou soti al dèyè manje. Ansasen toupatou nan peyi a. ¹⁰Grangou ban nou lafyèb. Kò nou cho kou dife. ¹¹Yo fè kadejak sou madanm nou sou mòn Siyon an. Nan tout ti bouk peyi Jida yo yo kenbe pitit fi nou yo. ¹²Yo pran chèf nou yo, yo pann yo. Yo derespekte granmoun nou yo. ¹³Yo fòse jenn gason nou yo rale moulen. Ti gason nou yo ap titibe anba gwo chay bwa. ¹⁴Granmoun yo pa chita nan pòtay lavil la ankò. Jennmoun nou yo pa chante ankò. ¹⁵Pa gen kè kontan lakay nou. Nou pa danse ankò! Lapenn plen kè nou! ¹⁶Tou sa ki te konn ban nou kè kontan disparèt. Nou te peche, malè tonbe sou nou. ¹⁷Nou malad nan fon kè nou, nou pa ka wè tèlman n'ap kriye, ¹⁸paske mòn Siyon an tounen savann. Se bèt nan bwa ase ki rete la. ¹⁹Men ou menm, Seyè, ou wa pou tou tan. W'ap gouvènen jouk sa kaba. ²⁰Poukisa ou lage nou pou tout tan sa a? Gen lè ou p'ap janm chonje nou ankò! ²¹Seyè, fè nou tounen vin jwenn ou non! Fè nou tounen vin jwenn ou! Fè nou viv jan nou te konn viv nan tan lontan an non! ²²Eske ou voye nou jete pou tout bon? Pou di ou p'ap janm sispann fache sou nou?