Resansman 1–2

Resansman 1

¹Premye jou dezyèm mwa nan dezyèm lanne depi moun pèp Izrayèl yo te soti kite peyi Lejip la, antan yo te nan dezè Sinayi a, Seyè a pale ak Moyiz nan Tant Randevou a. Li di l' konsa: ²-Se pou ou menm ak Arawon, nou fè yon resansman pou konte tout moun nan pèp Izrayèl la, dapre fanmi yo, dapre branch fanmi yo. W'a pran non tout gason, yonn apre lòt. ³N'a konte tou sa ki gen ventan osinon ki pi gran, depi yo bon pou fè lagè. N'a fè resansman an dapre jan lame a òganize. ⁴N'a pran yon chèf nan chak branch fanmi, dapre zansèt yo, pou ede nou. ⁵Men non moun ki va ede nou nan resansman an: Nan branch fanmi Woubenn lan, se va Elizou, pitit gason Chedeyou. ⁶Nan branch fanmi Simeyon an, se va Cheloumyèl, pitit gason Sourichadayi. ⁷Nan branch fanmi Jida a, se va Nakchon, pitit gason Aminadab. ⁸Nan branch fanmi Isaka a, se va Netanèl, pitit gason Swa. ⁹Nan branch fanmi Zabilon an, se va Eliyab, pitit gason Elon. ¹⁰Nan branch fanmi Efrayim, premye pitit gason Jozèf la, se va Elichama, pitit gason Amiyoud. Nan branch fanmi Manase, dezyèm pitit gason Jozèf la, se va Gamliyèl, pitit gason Pedachou. ¹¹Nan branch fanmi Benjamen an, se va Abidan, pitit gason Gideyoni. ¹²Nan branch fanmi Dann lan, se va Ayezè, pitit gason Amichadayi. ¹³Nan branch fanmi Asè a, se va Pagiyèl, pitit gason Okran. ¹⁴Nan branch fanmi Gad la, se va Elyasaf, pitit gason Dewèl. ¹⁵Nan branch fanmi Neftali a, se va Ayira, pitit gason Enan. ¹⁶Se moun sa yo yo te chwazi nan pèp la pou fè travay la. Se yo ki te chèf lakay yo, chèf branch fanmi zansèt yo. ¹⁷Moyiz ak Arawon pran douz mesye Bondye te nonmen yo, ¹⁸yo reyini tout pèp la, premye jou dezyèm mwa a. Yo pran non tout moun dapre fanmi yo, dapre branch fanmi zansèt yo. Yo konte tout gason, yonn apre lòt, tou sa ki gen ventan osinon ki pi gran, ¹⁹dapre lòd Seyè a te bay Moyiz la. Se nan dezè Sinayi a yo te fè resansman tout pèp la. ²⁰Se konsa yo konte tout gason nan branch fanmi Woubenn, premye pitit Jakòb la, tou sa ki gen ventan ak tou sa ki pi gran epi ki bon pou fè lagè. Yo pran non yo yonn apre lòt, yo di pitit ki moun yo ye, dapre fanmi yo, dapre branch fanmi zansèt yo. ²¹Yo jwenn karannsimil senksan (046.500) gason pou branch fanmi Woubenn lan. ²²Yo fè menm bagay la tou pou tout lòt branch fanmi yo. Pou branch fanmi Simeyon an, ²³yo jwenn senkantnèfmil twasan (059.300) gason. ²⁴Pou branch fanmi Gad la, ²⁵yo jwenn karannsenkmil sisansenkant (045.650) gason. ²⁶Pou branch fanmi Jida a, ²⁷yo jwenn swasannkatòzmil sisan (074.600) gason. ²⁸Pou branch fanmi Isaka a, ²⁹yo jwenn senkannkatmil katsan (054.400) gason. ³⁰Pou branch fanmi Zabilon an, ³¹yo jwenn senkannsètmil katsan (057.400) gason. ³²Pou branch fanmi Efrayim, premye pitit gason Jozèf la, ³³yo jwenn karantmil senksan (040.500) gason. ³⁴Pou branch fanmi Manase, dezyèm pitit gason Jozèf la, ³⁵yo jwenn tranndemil desan (032.200) gason. ³⁶Pou branch fanmi Benjamen an, ³⁷yo jwenn trannsenkmil katsan (035.400) gason. ³⁸Pou branch fanmi Dann lan, ³⁹yo jwenn swasanndemil sètsan (062.700) gason. ⁴⁰Pou branch fanmi Asè a, ⁴¹yo jwenn karanteyenmil senksan (041.500) gason. ⁴²Pou branch fanmi Neftali a, ⁴³yo jwenn senkanntwamil katsan (053.400) gason. ⁴⁴Se non tout moun sa yo Moyiz ak Arawon te pran lè sa a. Te gen douz chèf, yonn pou chak branch fanmi pèp Izrayèl la, ki t'ap ede yo nan travay la. ⁴⁵Pou tout branch fanmi yo ansanm, ⁴⁶yo jwenn sisantwamil senksansenkant (0603.550) gason. ⁴⁷Men yo pa t' fè resansman branch fanmi Levi a ansanm ak lòt branch fanmi yo, ⁴⁸paske Seyè a te di Moyiz konsa: ⁴⁹-Ou pa bezwen fè resansman branch fanmi Levi a. Ou pa bezwen konte moun fanmi Levi yo ansanm ak rès moun pèp Izrayèl yo. ⁵⁰Men, w'a mete moun fanmi Levi yo reskonsab Tant Randevou a ak tou sa ki ladan l' ansanm ak tou sa ki pou li. Se yo ki pou pote l' ansanm ak tou sa ki ladan l'. Se yo ki pou sèvi ladan l' epi yo gen pou yo moute kay yo fè wonn Tant Randevou a. ⁵¹Lè pou Tant Bondye a deplase, se moun fanmi Levi yo ki va demoute l'. Lè yo rive kote pou yo rete a, se moun fanmi Levi yo ki va moute l' tou. Nenpòt lòt moun ki pa nan branch fanmi Levi a epi ki ta pwoche bò tant lan, se pou yo touye l'. ⁵²Lòt moun pèp Izrayèl yo menm va moute tant yo apa, chak fanmi ansanm bò làbanyè yo, dapre pozisyon yo nan lame a. ⁵³Men, moun fanmi Levi yo va moute kay yo fè wonn Tant Randevou a pou kòlè Bondye pa tonbe sou pèp Izrayèl la. Se yo menm tou ki la pou veye sou Tant Randevou a. ⁵⁴Moun pèp Izrayèl yo te fè tou sa Seyè a te bay Moyiz lòd fè a. Se konsa yo te fè l' vre.

Resansman 2

¹Seyè a pale ak Moyiz ansanm ak Arawon, li di yo konsa: ²-Lè moun pèp Izrayèl yo va rive yon kote pou yo rete, chak moun va moute tant yo toupre làbanyè yo, anba ti drapo branch fanmi zansèt yo. Y'a moute tant yo devan ak sou kote Tant Randevou a, men pa twò pre l'. ³Tout moun k'ap mache anba làbanyè Jida a va moute kan yo sou bò solèy leve, chak divizyon apa. Se Nakchon, pitit gason Aninabad la, ki te chèf fanmi Jida a. ⁴Dapre resansman an, te gen swasannkatòzmil sisan (074.600) gason nan divizyon sa a. ⁵Moun Isaka yo va moute kan yo sou menm bò a, adwat moun Jida a yo. Se Netanèl, pitit gason Swa a, ki te chèf fanmi yo a. ⁶Dapre resansman an, te gen senkannkatmil katsan (054.400) gason nan divizyon sa a. ⁷Moun Zabilon yo va moute kan yo sou menm bò a tou, agoch moun Jida yo. Se Eliyab, pitit gason Elon an, ki te chèf fanmi yo a. ⁸Dapre resansman an, te gen senkannsètmil katsan (057.400) gason nan divizyon sa a. ⁹Konsa, anba làbanyè Jida a, te gen twa divizyon. Sa te fè antou sankatrevensimil katsan (0186,400) gason. Se toujou yo menm ki pou mache devan lè y'ap deplase. ¹⁰Tout moun k'ap mache anba làbanyè Woubenn yo va moute kan yo sou bò sid, chak divizyon apa. Se Elisou, pitit gason Chedeyou a, ki te chèf fanmi Woubenn lan. ¹¹Dapre resansman an, te gen karannsimil senksan (046.500) gason nan divizyon sa a. ¹²Moun Simeyon yo va moute kan yo sou menm bò a, adwat moun Woubenn yo. Se Cheloumyèl, pitit gason Sourichadayi a, ki te chèf fanmi yo a. ¹³Dapre resansman an, te gen senkannèfmil twasan (059.300) gason nan divizyon sa a. ¹⁴Moun Gad yo va rete sou menm bò a, agoch moun Woubenn yo. Se Elyasaf, pitit gason Reouyèl la, ki te chèf fanmi yo a. ¹⁵Dapre resansman an, te gen karannsenkmil sisan (045.600) gason nan divizyon sa a. ¹⁶Konsa, anba làbanyè Woubenn lan te gen twa divizyon. Sa te fè antou sansenkanteyenmil katsansenkant (0151.450) gason. Se toujou yo menm ki pou mache an dezyèm pozisyon lè y'ap deplase. ¹⁷Lè tout moun ap deplase, y'a mache nan menm pozisyon yo mete yo lè y'ap moute kan yo, anba làbanyè yo: de divizyon devan, de divizyon dèyè ak fanmi Levi yo nan mitan ap pote Tant Randevou a. ¹⁸Tout moun k'ap mache anba làbanyè Efrayim lan va moute kan yo sou solèy kouche, chak divizyon apa. Se Elichama, pitit gason Amiyoud la, ki te chèf fanmi Efrayin lan. ¹⁹Dapre resansman an, te gen karantmil senksan (040.500) gason nan divizyon sa a. ²⁰Moun Manase yo va moute kan yo sou menm bò a, adwat moun Efrayim yo. Se Gamliyèl, pitit gason Pedachou a, ki te chèf fanmi yo a. ²¹Dapre resansman an, te gen tranndemil desan (032.200) gason nan divizyon sa a. ²²Moun Benjamen yo va moute kan yo sou menm bò a tou, agoch moun Efrayim yo. Se Abidan, pitit gason Gideyoni a, ki te chèf fanmi yo a. ²³Dapre resansman an, te gen trannsenkmil katsan (035.400) gason nan divizyon sa a. ²⁴Konsa, anba làbanyè Efrayim lan, te gen twa divizyon. Sa te fè antou san witmil san (0108.100) gason. Se toujou yo menm ki pou mache an twazyèm pozisyon lè y'ap deplase. ²⁵Tout moun k'ap mache anla làbanyè Dann lan va moute kan yo sou bò nò, chak divizyon apa. Se Ayezè, pitit gason Amichadayi a, ki te chèf fanmi Dann lan. ²⁶Dapre resansman an, te gen swasanndemil sètsan (062.700) gason nan divizyon sa a. ²⁷Moun Asè yo va moute kan yo sou menm bò a, adwat moun Dann yo. Se Pagiyèl, pitit gason Okran an, ki te chèf fanmi yo a. ²⁸Dapre resansman an, te gen karanteyenmil senksan (041.500) gason nan divizyon sa a. ²⁹Moun Neftali yo va moute kan yo sou menm bò a tou, agoch moun Efrayim yo. Se Ayira, pitit gason Enan an, ki te chèf fanmi yo a. ³⁰Dapre resansman an, te gen senkanntwamil katsan (053.400) gason nan divizyon sa a. ³¹Konsa, anba làbanyè Dann lan, te gen twa divizyon. Sa te fè antou sansenkannsètmil sisan (0157.600) gason. Se toujou yo menm ki pou mache dèyè nèt, chak divizyon anba drapo pa yo. ³²Men kantite gason yo te jwenn nan pèp Izrayèl la dapre branch fanmi zansèt yo. Dapre resansman yo te fè a, divizyon pa divizyon, te gen sisantwamil senksansenkant (0603.550) gason antou. ³³Men yo pa t' konte moun branch fanmi Levi yo ansanm ak rès moun pèp Izrayèl yo, dapre lòd Seyè a te bay Moyiz la. ³⁴Moun pèp Izrayèl yo te fè tou sa Seyè a te bay Moyiz lòd fè a. Se konsa yo moute kan yo, chak divizyon apa, anba làbanyè pa yo. Lè y'ap deplase, yo mache pa divizyon, chak moun ansanm ak branch fanmi zansèt yo.