Sòm 134–140

Sòm 134

¹Se yon chante pou yo chante lè y'ap moute lavil Jerizalèm. Nou tout k'ap sèvi Seyè a, nou tout k'ap pase nwit lakay li ap sèvi l', ann fè lwanj Seyè a! ²Louvri bra nou nan tanp li, lapriyè, fè lwanj Seyè a! ³Se pou Seyè a rete sou mòn Siyon pou l' beni ou. Se li menm ki fè syèl la ak latè a.

Sòm 135

¹Lwanj pou Seyè a! Fè lwanj Seyè a! Nou tout k'ap sèvi Seyè a, ²nou tout ki kanpe lakay li, nan kote ki apa pou Bondye nou an, fè lwanj li! ³Fè lwanj Seyè a, paske li gen bon kè! Chante chante pou li, paske li aji byen ak nou. ⁴Se li menm ki te chwazi Jakòb pou moun pa l', se li menm ki te chwazi pèp Izrayèl la pou pèp li. ⁵Mwen konnen Seyè nou an gen gwo pouvwa. Li gen pouvwa pase tout lòt bondye yo. ⁶Li fè sa li vle nan syèl ak sou latè, sou lanmè ak nan fon lanmè. ⁷Li fè nwaj yo leve kote syèl la kole ak latè a, li fè zèklè ak lapli, li fè van yo soti kote li sere yo a. ⁸Se li menm ki te touye tout premye pitit gason ak tout premye pòte mal zannimo nan peyi Lejip. ⁹Se li ki te fè anpil mirak ak mèvèy nan peyi Lejip pou pini farawon an ansanm ak tout moun k'ap sèvi l' yo. ¹⁰Li detwi anpil nasyon, li touye wa ki te gen pouvwa: ¹¹Siyon, wa peyi Amon an, Og, wa peyi Bazan an ansanm ak tout wa nan peyi Kanaran yo. ¹²Li pran peyi yo, li bay pèp li a, wi, li bay moun pèp Izrayèl yo peyi moun sa yo pou yo rete. ¹³Seyè, lèzòm ap toujou konnen ki moun ou ye. Yo p'ap janm bliye ou! ¹⁴Seyè a va pran defans pèp li a, l'a gen pitye pou moun k'ap sèvi l' yo. ¹⁵Zidòl nasyon yo se bagay ki fèt ak ajan, ak lò. Se moun ki fè yo ak men yo. ¹⁶Yo gen bouch, men yo pa ka pale. Yo gen je, men yo pa ka wè. ¹⁷Yo gen zòrèy, men yo pa ka tande. Yo pa gen yon ti souf nan bouch yo. ¹⁸Moun ki fè zidòl yo ansanm ak tout moun ki mete konfyans yo nan yo, se pou yo tounen tankou yo. ¹⁹Nou menm, pèp Izrayèl la, fè lwanj Seyè a! Nou menm, prèt Bondye yo, fè lwanj Seyè a! ²⁰Nou menm k'ap sèvi nan tanp li a, fè lwanj Seyè a! Nou tout ki gen krentif pou Seyè a, fè lwanj li! ²¹Fè lwanj Seyè a nan peyi Siyon. nan lavil Jerizalèm, kote l' rete a. Lwanj pou Seyè a!

Sòm 136

¹Di Bondye mèsi, paske li gen bon kè. Wi, li p'ap janm sispann renmen nou! ²Di Bondye ki gen pouvwa pase tout lòt bondye yo mèsi. Wi, li p'ap janm sispann renmen nou! ³Di chèf ki pi gwo chèf pase tout chèf yo mèsi. Wi, li p'ap janm sispann renmen nou! ⁴Se li menm sèl ki fè gwo mèvèy. Wi, li p'ap janm sispann renmen nou! ⁵Avèk bon konprann li, li tè fè syèl la. Wi, li p'ap janm sispann renmen nou! ⁶L'a bati tè a sou dlo yo. Wi, li p'ap janm sispann renmen nou: ⁷Se li ki te kreye lalin ak solèy. Wi, li p'ap janm sispann renmen nou! ⁸Solèy pou klere lajounen. Wi, li p'ap janm sispann renmen nou! ⁹Lalin ak zetwal yo pou klere lannwit. Wi, li p'ap janm sispann renmen nou! ¹⁰Se li menm ki te touye tout premye pitit gason moun peyi Lejip yo. Wi, li p'ap janm sispann renmen nou! ¹¹Li fè pèp Izrayèl la soti nan peyi Lejip. Wi, li p'ap janm sispann renmen nou! ¹²Avèk kouraj li, ak fòs ponyèt li, Wi, li p'ap janm sispann renmen nou! ¹³Se li menm ki te fann Lanmè Wouj la de bò. Wi, li p'ap janm sispann renmen nou! ¹⁴Li fè pèp Izrayèl la pase nan mitan. Wi, li p'ap janm sispann renmen nou! ¹⁵Men, li pouse farawon an ak tout lame l' yo nan Lanmè Wouj la. Wi, li p'ap janm sispann renmen nou! ¹⁶Se li ki mennen pèp li a lè pèp la te nan tout dezè a. Wi, li p'ap janm sispann renmen nou! ¹⁷Li kraze wa ki te gen pouvwa. Wi, li p'ap janm sispann renmen nou! ¹⁸Li touye gwo wa yo. Wi, li p'ap janm sispann renmen nou! ¹⁹Siyon, wa peyi Amon an. Wi, li p'ap janm sispann renmen nou! ²⁰Og, wa peyi Bazan an. Wi, li p'ap janm sispann renmen nou! ²¹Li pran peyi yo, li bay pèp li a. Wi, li p'ap janm sispann renmen nou! ²²Li bay moun pèp Izrayèl yo peyi sa yo pou yo rete. Wi, li p'ap janm sispann renmen nou! ²³Li pa t' bliye nou lè nou te anba kou. Wi, li p'ap janm sispann renmen nou! ²⁴Li delivre nou anba men moun ki t'ap peze nou yo. Wi, li p'ap janm sispann renmen nou! ²⁵Se li ki bay tout moun ak tout zannimo manje. Wi, li p'ap janm sispann renmen nou! ²⁶Di Bondye ki anwo nan syèl la mèsi. Wi, li p'ap janm sispann renmen nou!

Sòm 137

¹Nou te chita bò larivyè ki nan peyi Babilòn yo, nou t'ap kriye lè nou chonje peyi Siyon. ²Nou te pandye gita nou yo nan branch pye sikren peyi a. ³Moun ki te fè nou prizonye yo t'ap mande pou nou chante pou yo. Moun ki t'ap peze nou yo t'ap mande pou nou anmize yo: -Chante yon chante peyi Siyon pou nou non! ⁴Ki jan ou ta vle pou n' chante yon chante Seyè a nan yon peyi etranje? ⁵Si nou bliye ou, Jerizalèm. se pou nou bliye ki jan pou nou sèvi ak men dwat nou tou. ⁶Si nou pa chonje ou, si nou pa konsidere ou tankou pi gwo kontantman nou, se pou lang nou kole nan fon bouch nou. ⁷Seyè, chonje sa moun peyi Edon yo te fè jou yo te pran lavil Jerizalèm. Chonje jan yo t'ap di: Kraze l'! Kraze l' ratè! ⁸Nou menm moun lavil Babilòn, yo gen pou yo fini ak nou yon lè. Benediksyon pou moun ki va fè ou sibi menm bagay ou te fè nou sibi a. ⁹Benediksyon pou moun ki va pran pitit ou yo, ki va kraze yo sou gwo wòch!

Sòm 138

¹Se yon sòm David. Seyè, m'ap di ou mèsi ak tout kè m'. La, devan lòt bondye yo, m'ap chante, m'ap jwe gita pou ou! ²M'ap mete ajenou devan kay ki apa pou ou a, m'ap fè lwanj ou, paske ou gen bon kè, paske ou toujou kenbe pawòl ou, paske ou fè sa ou te pwomèt la. Se tout moun k'ap nonmen non ou koulye a. ³Lè m' te rele ou, ou te reponn mwen, ou te ban m' plis kouraj. ⁴Tout moun ki sou latè va fè lwanj ou, Seyè, lè y'a vin konnen pawòl ki soti nan bouch ou. ⁵Y'a chante pou sa Seyè a te fè, y'a di: Ala gwo pouvwa Seyè a genyen! ⁶Wi, Seyè a anwo nan syèl la. Men, li wè moun ki soumèt devan li. Li rete byen lwen, li rekonèt moun k'ap fè grandizè yo. ⁷Menm lè mwen nan gwo tèt chaje, ou pa kite m' mouri. Ou leve men ou pou rete lènmi m' yo ki ankòlè. Ou sove m' avèk fòs ponyèt ou. ⁸W'a fin fè sa ou te konmanse fè pou mwen an. Seyè, ou p'ap janm sispann renmen nou. Pa vire do ou kite travay ou konmanse fè a!

Sòm 139

¹Pou chèf sanba yo. Se yon sòm David. Seyè, ou sonde m', ou konnen ki moun mwen ye. ²Ou konnen lè m' chita, ou konnen lè m' kanpe. Ou rete byen lwen, ou konnen tou sa k'ap pase nan tèt mwen. ³Mwen te mèt ap mache, mwen te mèt kouche, ou wè m', ou konnen tou sa m'ap fè. ⁴Mwen poko menm louvri bouch mwen, ou gen tan konnen tou sa mwen pral di. ⁵Kote m' vire, ou la bò kote m', w'ap pwoteje m' ak pouvwa ou. ⁶Konesans ou genyen yo twòp pou mwen. Yo depase m', mwen pa konprann yo. ⁷Ki bò mwen ta ale pou m' pa jwenn ak ou? Ki bò mwen ta ale pou ou pa wè m' devan je ou? ⁸Si m' moute nan syèl la, se la ou ye. Si m' desann kote mò yo ye a, ou la tou. ⁹Si m' vole ale bò kote solèy leve, osinon si m' al rete bò lòt bò lanmè, ¹⁰l'a ankò, w'ap toujou la pou mennen m', w'ap la pou pwoteje m'. ¹¹Si mwen di: -Bon! M' pral kache nan fènwa a. M' pral rete kote tout limyè mouri. ¹²Fènwa pa fè nwa pou ou. Lannwit klere kou lajounen pou ou. Kit li fènwa, kit li lajounen, se menm bagay pou ou. ¹³Wi, se ou ki fòme tout pati nan kò m', se ou ki ranje yo byen ranje nan vant manman m'. ¹⁴M'ap fè lwanj ou, paske ou pa manke fè bèl bagay. Tou sa ou fè se bèl bagay. Mwen konn sa byen. ¹⁵Ou te konnen tout zo nan kò m', depi lè m' t'ap fòme kote moun pa t' ka wè a, depi lè ou t'ap travay mwen ak ladrès nan fon tè a. ¹⁶Depi anvan m' te fèt, tout lavi m' te devan je ou. Tou sa mwen tapral fè te deja ekri nan liv ou, anvan menm mwen te fè yo. ¹⁷Bondye, sa ki nan tèt ou twò difisil pou m' konprann, lèfini yo anpil! ¹⁸Si m' ta vle konte yo, yo ta pi plis pase grenn sab ki bò lanmè. Si m' ta janm rive fin konte yo, mwen p'ap pi konnen ou pase sa. ¹⁹Bondye, si ou ta vle touye mechan yo! Si ou ta vle fè ansasen yo manyè kite m' an repo! ²⁰Yo anba chal! Y'ap revòlte kont ou. Y'ap pale ou mal. ²¹Seyè, kouman ou ta vle pou m' pa rayi moun ki rayi ou yo! Kouman ou ta vle pou m' pa gen degoutans pou moun k'ap leve dèyè ou yo? ²²Mwen pa manke rayi yo. Mwen konsidere yo tankou lènmi m'. ²³Sonde m', Bondye! Wè tou sa ki nan kè m'! Fouye m'! Wè tou sa ki nan lide m'! ²⁴Gade wè si m' sou yon move chemen. Mennen m' sou chemen ki la pou tout tan an.

Sòm 140

¹(0140:1) Pou chèf sanba yo. Se yon sòm David. (0140:2) Seyè, delivre m' anba mechan yo non! Pwoteje m' anba ansasen yo non, ²(0140:3) anba moun k'ap kalkile move lide nan tèt yo, ki tout tan ap pouse dife. ³(0140:4) Lang yo se razwa. Pawòl nan bouch yo se pwazon, ou ta di venen sèpan aspik. ⁴(0140:5) Seyè, pa kite m' tonbe anba men mechan yo, pwoteje m' anba ansasen yo k'ap chache jan pou yo fè m' tonbe. ⁵(0140:6) Awogan yo pare yon pèlen pou mwen, yo tann pèlen kòd pou mwen, yo mete moun veye m' sou tout chemen mwen. ⁶(0140:7) Mwen di Seyè a: -Se ou ki Bondye mwen. Koute m' non, Seyè, lè m'ap rele nan pye ou. ⁷(0140:8) Seyè, Bondye mwen, ou se fòs ki pou sove m' lan. W'ap pwoteje m' lè batay la mare. ⁸(0140:9) Seyè, pa kite mechan yo fè sa yo gen lide fè a! Pa kite sa yo vle fè a rive! ⁹(0140:10) Pa kite moun ki pa vle wè m' yo dominen sou mwen. Se pou mechanste ki nan bouch yo a tonbe sou yo! ¹⁰(0140:11) Se pou Bondye grennen chabon dife sou yo tankou lapli. Se pou l' fè yo tonbe nan gwo twou byen fon kote yo p'ap janm ka leve sòti. ¹¹(0140:12) Se pou moun k'ap pale moun mal yo pèdi pye nan peyi a. Se pou malè tonbe sou ansasen yo pou l' touye yo. ¹²(0140:13) Mwen konnen Seyè a va fè pòv yo jistis. L'a defann kòz moun ki san sekou yo. ¹³(0140:14) Wi, moun k'ap mache dwat yo va fè lwanj li. Moun ki obeyi l' yo va toujou viv devan l'.