Jòb 17–20

Jòb 17

¹Souf mwen prèt pou koupe. Mwen pa lwen mouri. Se pou simityè ase mwen bon. ²Kote m' vire, se moun k'ap pase m' nan betiz. Vye pawòl jouman yo enpoze m' dòmi. ³Ou mèt kwè m', Bondye! Se ou menm ankò ki pou bay garanti pou mwen. M' pa gen pesonn lòt ki ka tope ak yo. ⁴Ou fèmen lespri yo pou yo pa konprann. Pa kite yo gen rezon sou mwen. ⁵Pawòl la di: Yon moun ap fè gwo fèt pou zanmi l', epi pitit li yo ap mouri grangou anndan lakay li. ⁶Yo fè koze sou mwen nan pèp la. Yo vin krache nan figi m'! ⁷Mwen sitèlman nan lapenn, m' pa ka louvri je m'. Mwen fin tounen zo ak po. Ata lonbraj mwen pa fè! ⁸Moun k'ap mache dwat yo sezi lè yo wè sa. Inonsan yo fin debòde sou mechan an ki vire do bay Bondye. ⁹Moun k'ap mennen yon vi dwat, se yo ki gen rezon. Sa ki pa mete men yo nan ankenn move zafè kanpe pi rèd sou pozisyon yo. ¹⁰Nou tout mèt vin kanpe devan m', mwen p'ap jwenn yonn ladan nou ki gen bon konprann. ¹¹Mwen fin viv! Tout plan m' te gen nan tèt mwen kraze. Mwen pa gen ankenn espwa ankò. ¹²Yo pretann lannwit se lajounen. Lè fènwa, yo di limyè a pa lwen. ¹³Se lanmò m'ap tann. Se al kouche nan simityè ki sèl espwa m'. ¹⁴Mwen di tonm lan ou se papa m'. Mwen di vèmen ki pral manje m' yo: nou se manman m' ak sè m'. ¹⁵Kote ki gen espwa pou mwen ankò? Ki moun ki wè yon bon lavi pou mwen ankò? ¹⁶Lè m'a mouri, lè m'a fin desann nan peyi kote mò yo ye a, èske m'a ka pote espwa m' yo ansanm avè m'?

Jòb 18

¹Bildad, moun peyi Chwa a, pran lapawòl, li di konsa: ²-Jòb monchè, ou pa ka pe bouch ou yon ti kadè? Si ou te fè yon ti sispann, nou ta pale avè ou! ³Poukisa ou pran nou pou moun san konprann? Poukisa ou pran nou pou zannimo? ⁴Si ou ankòlè, se pwòp tèt ou ase w'ap fè mal. Atò, poutèt ou, se pou tout moun sou latè te mouri? Se pou Bondye te deplase mòn yo pou fè ou plezi? ⁵Wi, y'ap touye limyè mechan an, flanm dife l' la p'ap klere ankò. ⁶Lanp lakay li ap mouri, limyè lakay li ap tenyen. ⁷Li te konn mache byen enganm, koulye a se ti pa ti pa, l'ap bite. Se plan li t'ap fè yo ki lakòz sa rive l'. ⁸Li pile yon pèlen, pye l' pran ladan l'. ⁹Kòd la mare nan je pye l', l'ap sere l' byen sere. ¹⁰Yo kache yon chita tann pou li anba tè. Yo moute yon pèlen sou wout li. ¹¹Kote l' vire, malè ap tann li. Kote l' pase, yo la dèyè l'. ¹²Grangou nan kò l' fini ak kouraj li. Malè kanpe la bò kote l' ap tann li. ¹³Yon sèl maladi po pete sou tout kò l'. L'ap manje tout janm li ak tout bra li yo. Se tè ki pou geri l'. ¹⁴Yo rale l' mete deyò anba tant kote li te al kache a. Yo trennen l' devan jeneral Lanmò. ¹⁵Koulye a, nenpòt moun gen dwa pran kay li a pou yo. Y'ap dezenfèkte l' nèt ak souf. ¹⁶Anba tè, rasin li yo ap mouri. Anwo tè, branch li yo ap fennen. ¹⁷p'ap gen pesonn k'ap chonje l' ankò sou latè. Y'ap bliye l' nèt nan tout peyi a. ¹⁸Y'ap pouse l' soti nan limyè ale nan fènwa. Y'ap depòte l' byen lwen nan peyi san chapo. ¹⁹Li p'ap kite ni pitit, ni ankenn lòt fanmi nan mitan pèp la. Yo tout ap mouri anvan l'. ²⁰Depi solèy leve jouk solèy kouche, tout moun pral sezi wè jan li fini. ²¹Wi, men sa k'ap tann lakou moun k'ap fè mechanste yo, fanmi moun ki pa respekte Bondye yo.

Jòb 19

¹Jòb pran lapawòl, li di konsa: ²-Manyè sispann vire lòlòj mwen non! Manyè sispann kraze kouraj mwen ak tout pawòl sa yo? ³Tout tan n'ap plede joure m', n'ap trennen m' nan labou. Nou pa wont jan n'ap malmennen m' la a? ⁴Menm si mwen ta fè sa m' pa t' dwe fè, ki jan pou sa ta ka fè nou mal? ⁵Nou konprann nou pi bon pase m'. Nou di se paske mwen antò kifè m'ap pase tray sa a. ⁶Nou pa wè se Bondye k'ap manyen avè m'. Se li menm ki pran m' nan pèlen. ⁷Si m' rele anmwe ansasen, pesonn p'ap reponn. Si m' mande jistis, pesonn p'ap kanpe pou defann mwen. ⁸Bondye bare tout chemen devan mwen. M' pa ka pase. Li fè m' wè tou nwa devan mwen. ⁹Li fè yo ban m' move non. Li fè m' pèdi tout byen m'. ¹⁰Li minen m' tout jan. M'ap deperi. Li wete tout espwa m'. Mwen tankou yon pyebwa yo derasinen. ¹¹Bondye ankòlè nèt sou mwen. Li konsidere m' tankou yon lènmi. ¹²Li voye yon bann malè sou mwen yon grenn kou, tankou yon lame k'ap atake m'. Yo rive sou mwen san m' pa wè sa. Yo sènen m' anndan lakay mwen. ¹³Bondye fè frè m' yo renka kò yo sou mwen. Zanmi m' yo kouri pou mwen. ¹⁴Tout fanmi mwen yo, tout bon zanmi m' yo disparèt. Moun mwen te konn resevwa lakay mwen bliye m'. ¹⁵Ata sèvant lakay mwen pa rekonèt mwen. Pou yo, yo pa janm konnen m'. ¹⁶Si mwen rele yon domestik, li pa reponn mwen. Mwen te mèt lapriyè nan pye l', li pa okipe m'. ¹⁷Madanm mwen pa ka pran sant mwen. Ata pwòp pitit mwen yo pè pwoche bò kote m'. ¹⁸Tout timoun ap pase m' nan betiz. Si m' fè yon ti kanpe, yo pase m' nan tenten. ¹⁹Pi bon zanmi m' yo ap gade m' ak degoutans. Sa m' pi renmen yo ap pale sou do m'. ²⁰Mwen tounen zo ak po. Sa ki rete pou m' mouri a pa anyen. ²¹Nou se zanmi m'. Pitye pou mwen! Pitye! Se Bondye menm ki leve men sou mwen. ²²Poukisa pou nou leve dèyè m' tou menm jan ak Bondye? Koulye a, nou pa pèsekite m' kont nou? ²³Si sèlman te gen yon moun pou kouche pawòl mwen yo, pou ekri yo sou papye, ²⁴pou grave yo ak sizo sou wòch plat, pou yo toujou rete make! ²⁵Mwen menm, mwen konnen moun ki gen pou vin pran defans mwen an byen vivan. Se li menm an dènye k'ap kanpe sou latè pou pale pou mwen. ²⁶Apre m' fin mouri, l'ap mete m' kanpe bò kote l'. M'a wè Bondye ak pwòp je m'. ²⁷Se mwen menm menm k'ap wè l'. Se p'ap yon lòt moun! Kè m' ap fann, ²⁸paske n'ap mande ki jan pou n' fè m' pase mizè ankò? Ki rezon n'ap jwenn nan mwen pou nou atake m'? ²⁹Men, atansyon pou se pa sou nou nepe a tonbe, lè Bondye va soti pou pini moun ki antò yo. Lè sa a, n'a konnen gen yon moun k'ap jije tout bon.

Jòb 20

¹Lè sa a, Sofa, moun lavil Naama a, pran lapawòl, li di konsa: ²-Mwen gen yon bann lide k'ap travay nan tèt mwen. Mwen pa ka tann ankò. Se pou m' reponn ou. ³Tou sa ou di la a vekse m'. Men, mwen konnen jan pou m' reponn ou. ⁴Ou konnen, depi nan tan lontan, depi premye moun Bondye te mete sou tè a, ⁵mechan yo pa janm gen kè kontan pou lontan. Plezi moun k'ap fè mal yo se pou yon ti tan. ⁶Yo te mèt grandi jouk pou yo rive wotè syèl la, jouk pou tèt yo ta rive nan nwaj yo, ⁷y'ap rete konsa, y'ap disparèt tankou yon pil fatra yo boule. Moun ki te konnen yo va mande kote yo pase. ⁸Moun bliye yo tankou yon rèv yo fè yo pa ka chonje, tankou yon vizyon yo fè lannwit, yo p'ap janm wè ankò. ⁹Moun ki te konn wè yo p'ap wè yo ankò. Menm moun lakay yo p'ap konnen kote yo pase. ¹⁰Pitit yo va peye pòv yo pou tou sa yo te fè yo. Se pwòp pitit yo ak men yo ki va renmèt pòv yo sa yo te pran pa fòs. ¹¹Mechan yo te gen tout fòs jenn gason yo sou yo toujou. Men koulye a, tou sa pral tounen pousyè ansanm ak yo. ¹²Lè l' t'ap fè sa ki mal sa te sitèlman gou nan bouch li, li te kenbe ti gout anba lang li. ¹³Li pa t' kite l' fin twò vit nan bouch li, pou l' te ka jwi gou a pandan lontan. ¹⁴Men, rive manje a rive nan lestonmak li, li vin anmè kou fyèl. Anndan vant li pran boule l' tankou si li te vale pwazon. ¹⁵Mechan an gen pou l' vonmi tout richès li te vòlò yo, paske Bondye ap foure dwèt nan gòj li. ¹⁶Tou sa li te vale tounen pwazon pou li. L'ap mouri tankou si se yon sèpan laspik ki mòde l'. ¹⁷Li p'ap viv pou l' wè lwil koule tankou dlo larivyè, ni siwo myèl ak lèt koule tankou lavalas. ¹⁸L'ap blije bay tou sa li te travay fè. Li p'ap gen chans jwi richès li yo. ¹⁹Paske li te piye kay pòv malere yo, li te pito vòlò kay moun pase pou l' bati. ²⁰Li pa t' janm gen kont li. Men, richès li p'ap ka delivre l'. ²¹Pesonn pa t' ka chape anba men l' sitèlman li te akrèk. Non. Tout richès li yo pa la pou lontan. ²²Atout li gen tout richès sa yo, li pral gen kè sere. Tout kalite mizè pral tonbe sou li. ²³Pandan l'ap manje plen vant li, Bondye pral move kont move sou li. Malè pral tonbe dri sou li. ²⁴Lè l'ap chache kouri pou yon nepe fèt an fè, yon flèch an kwiv pral pèse l' pak an pak. ²⁵Yon flèch ap pèse kò l'. San li ap degoute konsa nan pwent flèch la. Kè l' sere, li wè lanmò anfas. ²⁶Li pèdi tou sa li te sere. Yon dife pesonn pa limen ap boule l'. L'ap devore tou sa ki lakay li. ²⁷Syèl la fè konnen tou sa li te fè ki mal. Latè kanpe pou denonse l'. ²⁸Yon sèl dlo desann va pote kay li ale, jou Bondye va fè kolè sa a sou li. ²⁹Wi, se sa Bondye sere pou mechan yo. Se sa mechan yo pral resevwa nan men Bondye.